सोलापूर : श्रमिक पत्रकार संघ आणि दयावान बहुउद्देशीय सामाजिक संस्था यांच्या संयुक्त विद्यमाने प्रसारमाध्यम क्षेत्रात कार्यरत महिलांसाठी विशेष रंगोत्सव उत्साहात साजरा करण्यात आला. या कार्यक्रमात आमदार व महापौर यांच्या पत्नीसह उपमहापौरांनी सहभाग घेत प्रसारमाध्यमातील महिलांना रंग लावत आनंदोत्सव साजरा केला.
सोलापूर श्रमिक पत्रकार संघाच्या आवारात पार पडलेल्या या कार्यक्रमात उत्साहपूर्ण वातावरण पाहायला मिळाले. प्रसारमाध्यमातील महिला पत्रकारांनी एकमेकांना रंग लावत आपुलकी आणि स्नेहाचा संदेश दिला. सामाजिक ऐक्य, आनंद आणि सकारात्मकतेचा संदेश देत हा रंगोत्सव संस्मरणीय ठरला. यावेळी उपमहापौर ज्ञानेश्वरी देवकर, मोनिका देवेंद्र कोठे, धनश्री विनायक कोंड्याल, नगरसेविका विजया नागेश खरात, धनश्री विनोद भोसले तसेच माजी नगरसेविका मंगला दिलीप कोल्हे यांची प्रमुख उपस्थिती होती.महिला पत्रकार, महिला प्रतिनिधी आणि मान्यवरांच्या उपस्थितीत रंग, आनंद आणि आपुलकीने भरलेला हा रंगोत्सव सोलापुरात उत्साहात पार पडला.उत्साहपूर्ण जल्लोष साजरा करण्यात आला.
उपमहापौर ज्ञानेश्वरी देवकर म्हणाल्या, रंगपंचमी साजरी करताना पर्यावरणाची जपणूक करणेही तितकेच महत्त्वाचे आहे. सर्वांनी इको-फ्रेंडली रंगांचा वापर करून सण साजरा करावा आणि पर्यावरणाचा ऱ्हास होणार नाही याची काळजी घ्यावी. तसेच प्रत्येकाने किमान एक झाड लावून वृक्षसंवर्धनासाठी योगदान द्यावे, असे आवाहन त्यांनी केले.
कार्यक्रमाच्या सुरुवातीला श्रमिक पत्रकार संघाचे अध्यक्ष विक्रम खेलबुडे आणि खजिनदार किरण बनसोडे यांनी उपस्थितांचे स्वागत केले. कार्यक्रमाचे सूत्रसंचालन श्वेता हुल्ले यांनी केले तर उपाध्यक्ष उमेश कदम यांनी आभार मानले. यावेळी विविध वृत्तपत्रातील महिला पत्रकार, निवेदिका मोठ्या संख्येने उपस्थित होत्या.
