सोलापूर – शहरातील कसबा गणपतीच्या वतीने सोमवारी सायंकाळी पारंपरिक उत्साहात मिरवणूक काढण्यात आली. ढोल-ताशांचा गजर, भक्तिमय वातावरण आणि नागरिकांच्या उत्स्फूर्त सहभागामुळे परिसरात उत्सवाचे वातावरण निर्माण झाले.
यावेळी कसबा गणपती शेतकरी संघटनेच्या वतीने विविध भागांतील कष्टकरी शेतकऱ्यांचा शाल, श्रीफळ व सन्मानचिन्ह देऊन गौरव करण्यात आला. शेती आणि अन्न उत्पादनासाठी शेतकरी देत असलेल्या मोलाच्या योगदानाबद्दल कृतज्ञता व्यक्त करण्याच्या उद्देशाने हा उपक्रम राबविण्यात आला.
मिरवणुकीत गणेशभक्तांसह शेतकरी, संघटनेचे पदाधिकारी आणि नागरिक मोठ्या संख्येने सहभागी झाले होते. “बळीराजा हा देशाचा खरा आधार आहे,” हा संदेश या उपक्रमातून देण्यात आला. उपस्थितांनी शेतकऱ्यांच्या सन्मानाच्या या अभिनव उपक्रमाचे स्वागत करत कौतुक व्यक्त केले.
कसबा गणपती शेतकरी संघटनेच्या या उपक्रमामुळे धार्मिक उत्सवाला सामाजिक बांधिलकीची जोड मिळाली असून, अन्नदात्या शेतकऱ्यांप्रती समाजाचा आदर आणि कृतज्ञतेची भावना अधिक दृढ झाल्याचे चित्र पाहायला मिळाले.
