परळी (प्रतिनिधी)…
संपूर्ण राज्याचे लक्ष लागलेल्या व हाय व्होल्टेज असणारा परळी विधानसभा मतदारसंघ हा मुंडे परिवाराचा बालेकिल्ला असल्याचे पुन्हा एकदा सिद्ध झाले. विरोधकांनी परळी विधानसभा मतदारसंघात धनंजय मुंडेंना चहूबाजूंनी घेरण्याचा प्रयत्न केला तरी परळी मतदारसंघात डीएम बॉसला नो चॅलेंज हे दाखवून देत धनंजय मुंडे यांनी राज्यात सर्वाधिक मताधिक्याने निवडून येत परळीचा बालेकिल्ला राखण्याचा पराक्रम केला आहे. या निवडणुकीत धनंजय मुंडे यांनी मताधिक्य मिळविण्याचा इतिहास रचत 194889 एवढी मते घेतली आहेत. तर तब्बल एक लाख 40 हजार मतांची लिड घेत परळीत धनंजय मुंडे विजयी झाले आहेत.
परळी वैजनाथ मतदार संघात अजित पवारांच्या राष्ट्रवादी काँग्रेसच्या वतीने भाजप महायुतीचे अधिकृत उमेदवार म्हणून धनंजय मुंडे यांना उमेदवारी देण्यात आली होती. तर राष्ट्रवादी काँग्रेस शरद पवार गटाच्या वतीने या ठिकाणी राजेसाहेब देशमुख यांना महाविकास आघाडीचे अधिकृत उमेदवार म्हणून निवडणुकीच्या आखाड्यात उतरवण्यात आले होते. अत्यंत चुरशीच्या ठरलेल्या या विधानसभा मतदारसंघात अनेक इच्छुकांना डावलत शरद पवारांनी धनंजय मुंडे यांना घेरण्यासाठी अगदी शेवटच्या क्षणी राजसाहेब देशमुख यांची उमेदवारी जाहीर केली.
2019 च्या विधानसभा निवडणुकीत एकमेका विरुद्ध निवडणूक लढवलेले पंकजा मुंडे व त्यांचे भाऊ धनंजय मुंडे हे यावेळी मात्र राज्यात झालेल्या महायुतीमुळे एकत्र आले होते. बहिण भावांच्या एकत्रिकरणाने
परळी मतदारसंघात अर्थातच महायुतीची ताकद वाढली. विशेष म्हणजे या निवडणुकीत धनंजय मुंडे यांनी कुठलीही मोठी प्रचार सभा घेतली नाही.
धनंजय मुंडे यांचे प्रतिस्पर्धी उमेदवार म्हणून राजेसाहेब देशमुख यांना प्रचारात आघाडी न घेता आल्याने ते पिछाडीवर पडल्याचे बोलल्या जात होते. या निवडणुकीत राजसाहेब देशमुख यांना 54665 एवढी मते मिळाली. शेवटी परळी विधानसभा मतदारसंघ हा मुंडे घराण्याचा बालेकिल्ला आहे हे दाखवून देत धनंजय मुंडे यांनी विरोधक असणारे राजसाहेब देशमुख यांना धोबीपछाड देत सबंध राज्यात इतिहास घडवला असून या निवडणुकीत 194889 मते घेत तब्बल 1 लाख 40 हजार 224 मतांची राज्यातील सर्वाधिक लीडची नोंद करत परळीचा बालेकिल्ला राखण्यात यश मिळवले आहे. यामुळे परळी मतदारसंघात डीएम बॉसला नो चॅलेंज असा नारा कार्यकर्त्यांच्या वतीने देण्यात येत आहे.
परळी विधानसभा मतदारसंघात उमेदवारांना मिळालेली मते पुढील प्रमाणे…
1. धनंजय मुंडे – विजयी-194889 (+140224)
2. राजेसाहेब देशमुख- 54665
3. साहस आदोडे – 2537
4. डी. एल. उजगरे – 1064
5. दयानंद लांडगे – 816
6. हिदायत सय्यद – 485
7. केदारनाथ जाधव – 340
8. अल्ताफ सय्यद – 248
9. राजेसाहेब देशमुख – 235
10. शाकेर शेख – 180
12. भागवत वैद्य – 143
13. नोटा – 912
