अक्कलकोट – समर्थ नगर,अक्कलकोट येथील श्रीमती लक्ष्मीबाई रामचंद्र गड्डद (७७) या ज्येष्ठ महिलेच्या पर्समधून चोरीस गेलेली अर्ध्या तोळ्याची बोरमाळ आणि पेन्शनचे ₹१२,६०० अवघ्या २४ तासांत शोधून काढत अक्कलकोट उत्तर पोलीस ठाण्याच्या डी.बी. पथकाने आरोपीला जेरबंद केले. पोलिसांच्या वेगवान, तांत्रिक आणि अचूक तपासामुळे गुन्ह्याचा अल्पावधीत उलगडा झाल्याने नागरिकांनी समाधान व्यक्त करत पोलिसांच्या धडाकेबाज कामगिरीचे कौतुक केले आहे. पोलीसांच्या सहकार्यामुळे लक्ष्मीबाई गड्डद यांच्या डोळ्यातुन आनंदाश्रु थांबु शकले नाहीत . त्यांनी साऱ्या पोलीस कर्मचारी व अधिकारी वर्गाचे आभार मानले .
समर्थ नगर येथील लक्ष्मीबाई रामचंद्र गड्डद (वय ७७) या सकाळी फत्तेसिंह चौकातील गणेश पोतदार यांच्या के.पी. कॉम्प्युटर्स एसबीआय ग्राहक सेवा केंद्रात पेन्शन काढण्यासाठी गेल्या होत्या. त्यांनी सकाळी ११.२४ वाजता ₹१२,६०० काढून ते अर्ध्या तोळ्याच्या बोरमाळीसह पर्समध्ये ठेवले. बीपीचा त्रास झाल्याने काही वेळ त्या सेवा केंद्रात बसून राहिल्या आणि नंतर रिक्षाने घरी गेल्या. घरी पोहोचल्यानंतर मुलाला पैसे देण्यासाठी पर्स उघडली असता रोख रक्कम आणि बोरमाळ गायब असल्याचे त्यांच्या निदर्शनास आले.
घाबरलेल्या लक्ष्मीबाईंनी तातडीने ग्राहक सेवा केंद्र गाठून चौकशी केली. प्राथमिक पाहणीत कोणताही ठोस धागा हाती लागला नाही.परिसरातील सर्व सीसीटीव्ही फुटेजही अस्पष्ट असल्याने तपासात अडचणी निर्माण झाल्या. मात्र डी.बी. पथकाने हार न मानता फत्तेसिंह चौकातील आयडीबीआय बँकेच्या सीसीटीव्ही फुटेजचा मागोवा घेतला. त्यामधील संशयास्पद हालचालींच्या आधारे पोलिसांनी गोपनीय माहिती, तांत्रिक विश्लेषण आणि संशयितांची कसून चौकशी केली. अखेर आरोपीपर्यंत पोहोचत चोरीचा गुन्हा उघडकीस आणला.
या प्रकरणी अक्कलकोट उत्तर पोलीस ठाण्यात प्रथम खबर क्रमांक ०४३६/२०२६ अन्वये भारतीय न्याय संहिता (BNS) २०२३ च्या कलम ३०३(२) अंतर्गत गुन्हा दाखल करण्यात आला असून आरोपीने चौकशीत गुन्ह्याची कबुली दिली दागिना आणि पैसा हस्तगत केला. चोराला अटक करण्यात आली आहे.
ही उल्लेखनीय कारवाई उपविभागीय पोलिस अधिकारी राजेंद्र टाकणे यांच्या मार्गदर्शनाखाली पोलीस निरीक्षक अविनाश पवार यांच्या नेतृत्वात डी.बी. पथकाचे पोलीस हेड कॉन्स्टेबल गणेश अंगुले, पोलीस कॉन्स्टेबल श्रीकांत जवळगे, पोलीस कॉन्स्टेबल विकास पवार आणि पोलीस कॉन्स्टेबल केदारनाथ सुतार यांनी केली.पोलीस निरीक्षक अविनाश पवार यांनी ज्येष्ठ नागरिकाच्या तक्रारीची तातडीने गांभीर्याने दखल घेत अवघ्या एका दिवसात गुन्ह्याचा उलगडा करून आरोपीला अटक केल्याने अक्कलकोट उत्तर पोलिसांच्या कार्यक्षमतेचे सर्वत्र कौतुक होत आहे.आणी विशेष करुन डी.बी. पथकाचे पोलीस हेड कॉन्स्टेबल गणेश अंगुले व पोलीस कॉन्स्टेबल श्रीकांत जवळगे यांनी या तपासाची खरे मानकरी ठरले आहे.त्यानंतर श्रीमती लक्ष्मीबाई गड्डद यांनी उपविभागीय पोलिस अधिकारी राजेंद्र टाकणे व पोलीस निरीक्षक अविनाश पवार आणी डी.बी. पथकाचे पोलीस हेड कॉन्स्टेबल गणेश अंगुले, पोलीस कॉन्स्टेबल श्रीकांत जवळगे व उत्तर पोलिस ठाण्याचे सर्व अधिकारी व कर्मचाऱ्यांची कृतज्ञता व्यक्त केले.
