पंढरपुर – येथे नव्याने मंजुर करण्यात आलेल्या अपर पोलीस अधीक्षक कार्यालया संदर्भात माहिती देताना प्रशांत परिचारक म्हणाले की, पंढरपूर हे महाराष्ट्रातील अत्यंत महत्त्वाचे आणि पवित्र धार्मिक क्षेत्र आहे. येथे दररोज लाखो भाविकांची आणि नागरिकांची वर्दळ असते. वाढती लोकसंख्या आणि भौगोलिक विस्तार पाहता कायदा व सुव्यवस्थेचा प्रश्न अधिक सक्षमपणे हाताळण्यासाठी पंढरपूर येथे स्वतंत्र अपर पोलीस अधीक्षक कार्यालय आणि उपमुख्यालय असणे अत्यंत गरजेचे होते. यासाठी गेल्या ५ वर्षांपासून राज्य शासन व गृह विभागाकडे आमचा सातत्याने पाठपुरावा सुरू होता. दक्षिण आणि पश्चिम सोलापूर जिल्ह्यातील कायदा व सुव्यवस्था अबाधित राखण्यासाठी, वाढती गुन्हेगारी, बेकायदेशीर वाळू वाहतूक व चोरी आणि इतर अवैध धंद्यांवर वचक बसवण्यासाठी पंढरपूर येथे स्वतंत्र अपर पोलीस अधीक्षक कार्यालय स्थापन करण्यास गृह विभागाने मंजुरी दिली असून, २४ जुलै रोजी याबाबतचा शासन निर्णय निर्गमित करण्यात आला आहे. या निर्णयामुळे पंढरपूर व परिसरातील जनतेला मोठा दिलासा मिळाला असून, गेल्या पाच वर्षांपासून सुरू असलेल्या सातत्यपूर्ण पाठपुराव्याला मोठे यश आले आहे, अशी माहिती माजी आमदार प्रशांत परिचारक यांनी दिली.
या निर्णयाबद्दल प्रशांत परिचारक यांनी राज्याचे मुख्यमंत्री देवेंद्र फडणवीस, उपमुख्यमंत्री एकनाथजी शिंदे, उपमुख्यमंत्री सुनेत्रा पवार आणि सोलापूर जिल्ह्याचे पालकमंत्री जयकुमार गोरे यांचे मनापासून आभार मानले आहेत. या बरोबरच पंढरपूरच्या सुरक्षेचा आणि कायदा-सुव्यवस्थेचा हा प्रस्ताव तांत्रिकदृष्ट्या सक्षम करून शासनाकडे पाठवण्यासाठी सहकार्य करणाऱ्या तत्कालीन पोलीस अधीक्षक तेजस्विनी सातपुते, पोलीस अधीक्षक शिरीष सरदेशपांडे आणि सध्याचे पोलीस अधीक्षक अतुल कुलकर्णी यांच्या प्रयत्नांचेही त्यांनी विशेष कौतुक व आभार व्यक्त केले.
——————-
चौकट : ( गुन्हेगारी व अवैध वाळू उपशावर बसणार कडक वचक )
पंढरपूर येथे नव्याने निर्मित होणाऱ्या या अपर पोलीस अधीक्षक कार्यालयांतर्गत पंढरपूर, मंगळवेढा आणि अकलूज या तीन उपविभागांमधील ११ पोलीस ठाणी जोडली जाणार आहेत. यामुळे पंढरपूर शहर , पंढरपूर तालुका, पंढरपूर ग्रामीण, पंढरपूर मंदिर सुरक्षा, करकंब, सांगोला, मंगळवेढा, अकलूज, माळशिरस, नातेपुते व वेळापूर परिसरातील पोलीस प्रशासनावर थेट व गतिमान नियंत्रण राहील. शहरातील वाढत्या गुन्हेगारीला चाप बसेल. नदीपात्रातून होणारी बेकायदेशीर वाळू चोरी, तस्करी व अवैध धंद्यांवर पोलीस प्रशासनाचा कडक वचक निर्माण होईल. कायदा व सुव्यवस्थेचे प्रश्न स्थानिक पातळीवर जलद गतीने सुटण्यास मदत होईल.नवीन कार्यालयासाठी पदनिर्मिती आणि प्राथमिक खर्चासाठी शासनाने निधीही मंजूर केला असून, लवकरच मनुष्यबळ उपलब्ध होऊन हे कार्यालय प्रत्यक्ष पूर्ण क्षमतेने कार्यरत होईल.पंढरपूर व परिसरातील नागरिकांच्या सुरक्षिततेसाठी आणि शांततेसाठी हे कार्यालय फायद्याचे ठरणार असा विश्वास देखील प्रशांत परिचारक यांनी यावेळी व्यक्त केला.
