करमाळा – अण्णासाहेब पाटील आर्थिक मागास विकास महामंडळाच्या माध्यमातून मराठा समाजातील सुशिक्षित बेरोजगार तरुण, उद्योजक आणि शेतकरी बांधवांना विविध योजनांचा लाभ मिळवून देण्यामध्ये येणाऱ्या अडचणी त्वरित दूर कराव्यात, या मागणीसाठी मराठा क्रांती मोर्चा व सकल मराठा समाज, करमाळा यांच्या वतीने महामंडळाच्या जिल्हा कार्यालयाला ‘जाहीर निवेदन’ देऊन विविध मागण्या करण्यात आल्या आहेत.
दिलेल्या निवेदनात खालील प्रमुख मागण्या मांडण्यात आल्या आहेत:
वाहन कर्जाची बंद ‘LOI’ पूर्ववत सुरू करा: वाहन कर्जासाठी बंद करण्यात आलेली LOI (Letter of Intent) प्रक्रिया तातडीने सुरू करण्यात यावी.
कर्जासाठी जाचक अटी शिथिल करा: सात-बारा उताऱ्याची अट आणि चार लाखांवरील कर्जासाठी दोन जामीनदार मागण्याची अट शिथिल करण्यात यावी. अनेक तरुणांकडे स्वतःची जमीन नसल्याने किंवा जामीनदार न मिळाल्याने ते या योजनेच्या लाभापासून वंचित राहत आहेत.
दलालांची मध्यस्थी थांबवून पारदर्शकता आणा: महामंडळाच्या विविध योजना, सबसिडी आणि व्याजदराबाबत अधिकारी पूर्ण माहिती देण्यास टाळाटाळ करतात, परंतु दलालांमार्फत प्रकरणे वेगाने केली जातात. हा प्रकार थांबवून सर्वसामान्यांना थेट लाभ द्यावा.
पेंडिंग सबसिडी व व्याज परतावा त्वरित द्या: कर्ज मंजूर झाल्यानंतर सबसिडीचा पैसा बँकेकडे येण्यासाठी ६ ते ८ महिने लागतात. गेल्या ६ महिन्यांपासून मिळणारा व्याज परतावा थकला असून, व्याजाचे हप्ते स्वतः भरावे लागत असल्याने नवीन उद्योजक आर्थिक अडचणीत आले आहेत. हा थकीत व्याज परतावा तातडीने जमा करण्यात यावा.
CIBIL (सिबिल) स्कोअर बाबत शिथिलता: सिबिल स्कोअर ६५० पेक्षा कमी असलेल्या किंवा नवीन लहान कर्जदारांची प्रकरणे नाकारली जातात. याबाबत सकारात्मक निर्णय घेण्यात यावा.
२०२३-२४ मधील बिनव्याजी कर्ज प्रकरणे अपलोड करण्याची संधी द्या: महामंडळाच्या वेबसाईटवर पर्याय उपलब्ध नसल्याने रखडलेली २०२३-२४ ची बिनव्याजी कर्ज प्रकरणे पुन्हा अपलोड करण्याची संधी देण्यात यावी.
त्रुटी निवारण (Claim Hold) जलद गतीने करा: कागदपत्रांमधील त्रुटींचे निवारण होण्यास होणारा विलंब टाळून जलद गतीने कामे पूर्ण करण्यात यावीत.
करमाळा तालुक्यातील १००% कामे ऑनलाईन व संपर्कसुलभ करा: सोलापूर हे करमाळ्यापासून लांब असल्याने गोरगरीब बांधवांना तेथे जाणे परवडत नाही. त्यामुळे १००% कामे ऑनलाईन, ई-मेल किंवा फोनद्वारे करण्यात यावीत आणि कार्यालयातील अधिकाऱ्यांनी दूरध्वनीवरून सहकार्य करावे.
मराठा क्रांती मोर्चा व सकल मराठा समाज, करमाळा (ता. करमाळा, जि. सोलापूर) यांच्या वतीने सचिन अशोक काळे, प्रवीण हीरगुडे यांच्यासह मराठा बांधवांनी हे निवेदन प्रशासनाला सादर केले आहे.यावेळी सोलापूर विधान परिषदेचे आमदार राजेंद्र राऊत सकल मराठा समाजाच्या वतीने सचिन अशोक काळे , मराठा महासंघाचे जिल्हा अध्यक्ष अर्जुनराव चव्हाण , सोलापूर महानगरपालिकेचे नगरसेवक आनंद नेते जाधव , करमाळा स्वराज्य पक्षाचे तालुकाध्यक्ष प्रवीण हेरगुडे , शंभू जगताप व अन्य बांधव त्या वेळी उपस्थित होते शासनाने व महामंडळाने या मागण्यांचा त्वरित विचार न केल्यास तीव्र भूमिका घेण्याचा इशाराही या वेळी देण्यात आला.
