सोलापूर – निलेश गायकवाड क्रिकेट अकॅडमी आयोजित इंटर क्लब क्रिकेट स्पर्धेत ‘एम बी चॅलेंजर’ संघाने ‘पँथर्स’चा १ गडी राखून पराभव करत स्पर्धेत विजयी सुरुवात केली. डॅनियल सौदागरची अर्धशतकी खेळी आणि प्रीतम शिंगेची अष्टपैलू कामगिरी या सामन्याचे मुख्य वैशिष्ट्य ठरले.
सामन्यात पँथर्स संघाने नाणेफेक जिंकून प्रथम फलंदाजी करण्याचा निर्णय घेतला. मात्र, एम बी चॅलेंजरच्या नियंत्रित गोलंदाजीसमोर पँथर्सचा डाव ३० षटकांत सर्वबाद १५० धावांवर मर्यादित राहिला. पँथर्सकडून फलंदाजीत नकुल होनमाने याने २५, आर्यन भालेराव याने १५ तर श्रीकर चव्हाण याने ११ धावा केल्या. एम बी चॅलेंजरकडून गोलंदाजी करताना प्रीतम शिंगेने १२ धावांत ३ बळी घेतले, तर सिद्धार्थ कुमशीने १७ धावांत २ बळी घेत पँथर्सच्या धावसंख्येला ब्रेक लावला.
प्रत्युत्तरादाखल १५१ धावांचे आव्हान घेऊन मैदानात उतरलेल्या एम बी चॅलेंजर संघाची सुरुवातही खडतर झाली. परंतु, डॅनियल सौदागरने ५४ धावांची उत्कृष्ट अर्धशतकी खेळी करत संघाचा विजय सुकर केला. त्याला जय प्रकाश (१९ धावा) आणि तनुष नाईक (१४ धावा) यांनी उपयुक्त साथ दिली. एनजीसीए पँथर्सच्या कबीर कीर्तीकरने अवघ्या ४ धावांत ३ बळी आणि शांभवी शिंदकरने २२ धावांत २ बळी घेत सामन्यात चांगलीच रंगत निर्माण केली होती. अखेर एम बी चॅलेंजरने २७.२ षटकांत ९ गड्यांच्या मोबदल्यात १५१ धावा करत १ गड्याने थरारक विजय साकारला.
उत्कृष्ट कामगिरीबद्दल प्रीतम शिंगेला ‘सामनावीर’ आणि ‘उत्कृष्ट गोलंदाज’ म्हणून गौरवण्यात आले, तर डॅनियल सौदागरला ‘उत्कृष्ट फलंदाज’चा पुरस्कार मिळाला. या सामन्यासाठी पंच म्हणून प्रवीण कुलकर्णी व साकिब सय्यद यांनी काम पाहिले. तर गुणलेखक आणि समालोचक म्हणून वीरभद्र कोळी यांनी जबाबदारी सांभाळली.
