पंढरपूर – श्री विठ्ठल-रुक्मिणी मंदिरे समिती, पंढरपूर यांच्या वतीने आयोजित श्री गणेशोत्सव संगीत महोत्सवात मुंबई येथील ख्यातनाम गायिका श्रृती पाटील यांनी शास्त्रीय गायनासोबतच अभंग-भजनांची सुरेल मैफिल सादर करून पंढरपूरकर कला रसिकांना मंत्रमुग्ध केले.
सहअध्यक्ष ह.भ.प. गहिनीनाथ महाराज औसेकर, कार्यकारी अधिकारी श्रीकांत यादव, व्यवस्थापक प्रवीणकुमार घम यांच्या मार्गदर्शनाखाली सुरू असलेल्या या संगीत महोत्सवातील पाचव्या दिवशीच्या गायन पुष्पाची सुरुवात श्री विठ्ठल-रुक्मिणी मंदिर समितीचे सदस्य ह.भ.प. ज्ञानेश्वर महाराज जळगांवकर, सदस्या ॲड. माधवी निगडे, सदस्य ह.भ.प. प्रकाश महाराज जवंजाळ, व्यवस्थापक प्रवीणकुमार घम तसेच मान्यवर कलाकारांच्या हस्ते श्री विठ्ठलाच्या प्रतिमेचे पूजन व दीपप्रज्वलनाने झाली.
यावेळी श्रृती पाटील यांच्या स्वरातील ‘माझे माहेर पंढरी’ हा अभंग युट्यूबवर प्रसारित करण्यात आला. तसेच त्यांच्या आजोबांचे, भजनसम्राट रायगडभूषण श्री. निवृत्तीबुवा चौधरी यांनी १०८ रागांतील अभंग नोटेशनसहित प्रकाशित केलेले ‘भजनछंद’ हे पुस्तक विठुरायाच्या चरणी अर्पण करून आशीर्वाद घेण्यात आला.
मैफिलीची सुरुवात पुरीया धनाश्री रागातील ‘पायलीया झनकार बाजे’ या बंदिशीने झाली. त्यानंतर ‘रंग ना डालो श्यामजी’ या सुरेल बंदिशीने रसिकांची दाद मिळवली. पुढे वारकरी संप्रदायाचा बीजमंत्र ‘जय जय राम कृष्ण हरी’, ‘रूप पाहता लोचनी’, ‘माझे माहेर पंढरी’, ‘अबीर गुलाल उधळीत रंग’, ‘अवघे गरजे पंढरपूर’ आणि ‘सुखाचे जे सुख चंद्रभागे तटी’ या अभंगांनी संपूर्ण वातावरण भक्तिमय झाले. कार्यक्रमाची सांगता ‘स्वामी कृपा कधी करणार’ या भावस्पर्शी भैरवीने झाली. श्रृती पाटील यांच्या गायनाला हार्मोनियमवर आबासाहेब परकाळे, पखवाजवर ज्ञानेश्वर दुधाणे, तबल्यावर गणेश लोहार आणि टाळावर माऊली पिसे यांनी सुरेल साथसंगत केली.
यावेळी पंढरपूरच्या कला रसिकांनी मोठ्या संख्येने उपस्थित राहून या अविस्मरणीय संगीत मैफिलीचा आनंद घेतला. कार्यक्रमानंतर सर्व कलाकारांचा श्री विठ्ठल-रुक्मिणी मंदिरे समितीच्या वतीने सत्कार करण्यात आला.
——————
चौकट : ( ‘कल्चर शिदोरी’ कार्यक्रमाने होणार महोत्सवाचा समारोप )
श्री गणेशोत्सव संगीत महोत्सवाचा समारोप ‘कल्चर शिदोरी’ या सांस्कृतिक कार्यक्रमाने होणार आहे. पंढरपूरकर कला रसिकांनी या कार्यक्रमास मोठ्या संख्येने उपस्थित राहून सांस्कृतिक मेजवानीचा आनंद घ्यावा, असे आवाहन श्री विठ्ठल-रुक्मिणी मंदिरे समितीच्या वतीने करण्यात आले आहे.
