सोलापूर – मध्य रेल्वेच्या सोलापूर विभागाने ९ जून २०२६ रोजी ‘आंतरराष्ट्रीय लेव्हल क्रॉसिंग जागरूकता दिवस’ साजरा केला. याअंतर्गत सोलापूर-वाडी, सोलापूर-दौंड, कुर्डुवाडी-लातूर आणि कुर्डुवाडी-मिरज या सेक्शनमधील विविध ठिकाणी व्यापक जागरूकता कार्यक्रम आणि संपर्क उपक्रम राबविण्यात आले. लेव्हल क्रॉसिंगवरील सुरक्षित पद्धती आणि अपघात प्रतिबंधाचे महत्त्व यांबाबत रस्ते वापरकर्ते, रेल्वे कर्मचारी व स्थानिक नागरिकांना जागरूक करणे हा या मोहिमेचा उद्देश होता.
रेल्वे मार्ग ओलांडण्यापूर्वी नेहमी ‘थांबा, पहा आणि ऐका’ या तत्त्वाचे पालन करावे; गेट्स बंद असताना किंवा बंद होत असताना मार्ग ओलांडू नये; मोबाईल फोन आणि इअरफोन्ससारख्या गोष्टींमुळे होणारे दुर्लक्ष टाळावे; गेटकीपर्सच्या सूचनांचे पालन करावे आणि रेल्वे मार्गावर वाहने उभी करणे टाळावे. तसेच, विद्युतीकरण झालेल्या रेल्वे मार्गांवर ओव्हरहेड उपकरणांपासून सुरक्षित अंतर राखण्यावर आणि अति-उंचीची किंवा ओव्हरलोड वाहने चालवताना विशेष खबरदारी घेण्यावर भर देण्यात आला.
