पंढरपूर – सोलापूर जिल्ह्यासह पंढरपूर तालुक्यात यंदा पावसाने ओढ दिल्याने दुष्काळी परिस्थिती निर्माण झाली आहे. त्याचा थेट परिणाम यंदाच्या दिवाळीच्या फटाका बाजारावर पाहायला मिळत आहे. शेतकऱ्यांच्या हातात पैसा नसल्याने शोभेची दारू, मोठे फटाके आणि चायनीज फॅन्सी आइटम्सना यंदा मागणी मोठ्या प्रमाणात घटली असल्याची माहिती पंढरपूर येथील जुने फटाका विक्रेते पवन बेणारे यांनी दिली.
दरवर्षी दिवाळीच्या पंधरा दिवस आधीपासून फटाका बाजारात उलाढाल सुरू होते. मात्र यंदा ग्राहक फक्त लहान मुलांचे छोटे फटाके, फुलबाजी, भुईचक्र यालाच पसंती देत आहेत. मोठे आवाजाचे फटाके, आकाशात उडणारे रॉकेट, अनार याकडे ग्राहक पाठ फिरवत आहेत.
पंढरपूर येथील भक्ती मार्ग जवळील न पा प्रशासनाच्या भव्य पार्किंग मध्ये सुमारे ३५ फटाक्याचे स्टॉल सजले असून अपेक्षित व्यवसाय सुरू झाला नाही असे अनेक फटाका विक्रेत्यांनी सांगितले.
————–
चौकट: (भाववाढीचा दुहेरी फटका)
यंदा फटाक्यांच्या किमतीतही १५ ते २० टक्क्यांनी वाढ झाली आहे. कच्च्या मालाच्या दरवाढीमुळे आणि वाहतूक खर्च वाढल्याने शिवकाशीहून येणाऱ्या फटाक्यांचे दर वाढले आहेत. त्यामुळे ग्राहक आणखी कमी खरेदी करत आहेत.
दरम्यान शहरातील सर्व फटाका विक्रेत्यांनी नगर पालिका प्रशासनाच्या भव्य वाहनतळावर दुकाने लावली आहेत.सुरक्षिततेच्या दृष्टीने अग्निशामक दलाच्या वतीने अग्निशामक बंबाची देखील व्यवस्था करण्यात आली आहे.
————–
चौकट : ( सर्व व्यवसायांवर परिणाम)
सध्या दिवाळीच्या सर्वच व्यावसायिक घटकावर दुष्काळ आणि महागाई यांचा विपरीत परिणाम झाला असल्याचे दिसून येत आहे. नोकरदार वर्गालाही वेळेत बोनस, मिळाल्याने आणि ऊस कारखान्याची बिले प्राप्त न झाल्याने बाजारात मंदीचे वातावरण निर्माण झाले असून याचा फटका शोभेची दारू, फटाके व्यापाऱ्यांना बसला आहे.
—————-
कोट
“गेली २० वर्षे आम्ही फटाका विक्री करतो, पण यंदा सारखी मंदी कधी पाहिली नाही. दुष्काळामुळे ग्रामीण भागातील ग्राहक खरेदीला येत नाहीये. जो येतो तो फक्त २००-५०० रुपयांचीच खरेदी करून जातो. शोभेची दारू आणि मोठ्या फटाक्यांची मागणी ५० टक्क्यांनी कमी झाली आहे.”
पवन बेणारे (फटका विक्रेता)
