सोलापूर : इनकम टॅक्स ऑफीसमध्ये नोकरीस लावतो म्हणून सव्वा ५ लाख घेऊन सहा जणांची फसवणूक केल्याप्रकरणी एका व्यक्ती विरूद्ध फौजदार चावडी पोलिस ठाण्यात गुन्हा दाखल करण्यात आला आहे. हा प्रकार ऑक्टोंबर २०२५ ते मे २०२६ दरम्यान घडला.
संदीप शिवाळ ऊर्फ संदीप शर्मा (रा. बाळे) असे गुन्हा दाखल झालेल्याचे नाव असून याबाबत उशांत कपिल जाधव (रा. न्यू बुधवार पेठ, आंबेडकर नगर सोलापूर) यांनी फिर्याद दिली आहे .मागील वर्षी फिर्यादीचे वडील एका दवाखान्यात ॲडमिट होते. तेथे संदीप शर्मा याच्याशी ओळख झाली होती. संदीप याने मी इनकम टॅक्स ऑफिसमध्ये क्लर्क म्हणून नोकरीला आहे. शिवाय माझी पत्नी केंद्रीय विद्यालयात नोकरीला आहे. दोन्ही ठिकाणी नोकरीच्या जागा आहेत असे सांगितले. तुम्हाला नोकरी लावतो असे सांगून त्याने फिर्यादीसह सहा जणांकडून ५ लाख २५ हजार रूपये घेतले. मात्र, कालांतराने त्यांना नोकरी न लावता टाळाटाळ करू लागला. फसवणूक झाल्याचे लक्षात आल्यानंतर याबाबत पोलिसात तक्रार दाखल करण्यात आल्याची फिर्यादीत म्हटले आहे . फौजदार वर्षाराणी सुतार या गुन्ह्याचा पुढील तपास करीत आहेत.
