करकंब प्रतिनिधी:-लोकसभा निवडणुकीच्यावेळी काही अडचणींमुळे स्वराज्य पक्षाने ती निवडणूक लढवली नव्हती मात्र आगामी विधानसभा निवडणुकीमध्ये स्वराज्य पक्ष पूर्ण ताकतीने निवडणुकीच्या मैदानामध्ये उतरणार असल्याची घोषणा स्वराज्य पक्षाचे संस्थापक युवराज छत्रपती संभाजीराजे यांनी केली.’स्वराज्य’ पक्षाच्या दुसऱ्या वर्धापन दिनानिमित्त भोसे(क)ता.पंढरपूर येथे शासकीय महामंडळाचा महाएक्स्पो आयोजित करण्यात आला होता. त्यावेळी ते बोलत होते.
यावेळी डॉ.बाबासाहेब आंबेडकर यांचे पणतू राजरत्न आंबेडकर,विठ्ठल सहकारी साखर कारखान्याचे चेअरमन अभिजीत पाटील,व्याख्याते श्रीमंत कोकाटे,स्वराज्य पक्षाचे जिल्हाध्यक्ष आणि कार्यक्रमाचे आयोजक प्रा. महादेव तळेकर उपस्थित होते.यावेळी बोलताना संभाजीराजेंनी स्वराज्य पक्ष हा सर्व जाती,धर्मांना एकत्र घेऊन पुढे जाणारा पक्ष आहे. समाजाचे भले व्हावे या उद्देशानेच समाजाच्या सर्व घटकांपर्यंत शासकीय योजनांचा लाभ मिळवून देणाऱ्या महामंडळांना एकाच छताखाली आणून त्याचा सर्वसामान्यांना फायदा होण्याच्या दृष्टीने या एक्सपोचे आयोजन करण्यात आले आहे. या ठिकाणी महामंडळाच्या अधिकाऱ्यांकडून सविस्तर माहिती घेऊन युवकांनी आत्मनिर्भर व्हावे असे आव्हान केले.
यावेळी राजरत्न आंबेडकर यांनी केवळ निवडणुकीपुरता फुले,शाहू, आंबेडकरांच्या नावाचा वापर केला जातो मात्र संभाजीराजे यांच्या आचारात आणि विचारात असा कोणताही फरक दिसत नाही,यापुढे सर्व जाती,धर्मांना सोबत घेऊन आम्ही राजकारण करू असे मनोगत व्यक्त केले.अभिजीत पाटील,श्रीमंत कोकाटे, प्रा.महादेव तळेकर यांचीही भाषणे झाली.
या महामंडळ एक्स्पोमध्ये सर्व जाती धर्माच्या १३ शासकीय महामंडळांचे प्रतिनिधी,जिल्हास्तरीय अधिकारी यांनी महाराष्ट्रात पहिल्यांदाच एकाच छताखाली येऊन लाभार्थ्यांच्या शंकाचे निरसन केले. या कार्यक्रमासाठी स्वराज्य पक्षाचे पदाधिकारी,विठ्ठलचे संचालक महेश खटके,विजय साळुंखे,अजय जाधव, युवराज सरडे यांच्यासह युवकवर्ग मोठ्या संख्येने उपस्थित होता.
चौकट.
अभिजीत पाटील यांना स्वराज्य पक्षात येण्याचे आवाहन
भविष्यात जनतेसमोर स्वराज्य पक्ष हाच एकमेव पर्याय असणार आहे. त्यामुळे सध्या इकडे तिकडे जाऊ पाहणाऱ्या अभिजीत पाटलांनी स्वराज्य पक्षाच्या छताखालीच निवडणूक लढवावी.
युवराज छत्रपती संभाजीराजे.
फोटो ओळ.भोसे (क) येथे आयोजित शासकीय महामंडळाच्या महाएक्स्पो मध्ये मार्गदर्शन करताना युवराज छत्रपती संभाजीराजे समोर उपस्थित जनसमुदाय.
