सोलापूर – दिनांक 30 मार्च 2026 सोमवार, सोलापूर येथील श्राविका संकुलात अहिंसेचे महान उपासक, जगाला शांतीचा संदेश देणारे,जैन धर्माचे 24 वे तीर्थंकर श्री 1008 भगवान महावीर यांचा 2625 वा जन्मकल्याणक महोत्सव भक्तिमय वातावरणात, मोठ्या उत्साहात संपन्न झाला.
यावेळी आयोजित कार्यक्रमाच्या अध्यक्षस्थानी उमाबाई श्राविका विद्यालय व कनिष्ठ महाविद्यालयाचे प्राचार्य सुकुमार मोहोळे तर प्रमुख अतिथी म्हणून प्रशालेच्या वरिष्ठ दीप्ती शहा, चतुरबाई प्राथमिक विद्यालयाच्या मुख्याध्यापिका राखी देशमाने, उमाबाई श्राविका विद्यालयाच्या उपमुख्याध्यापिका अश्विनी पंडित, पर्यवेक्षक बाळासाहेब पौळ यांची उपस्थिती होती.
कार्यक्रमाच्या प्रारंभी श्री 1008 भगवान महावीर यांच्या प्रतिमेचे मान्यवरांच्या हस्ते पूजन करून पुष्पांजली अर्पण करण्यात आली. यानंतर प्रशालेच्या वरिष्ठ दीप्ती शहा यांच्या हस्ते ध्वजारोहण करण्यात आले. उमाबाई श्राविका विद्यालयातील सहशिक्षिका पल्लवी खांडवे व सोनाली उंडे यांनी आपल्या सुमधुर आवाजात जैन ध्वजगीताचे सादरीकरण केले. विद्यार्थ्यांनी याप्रसंगी *जिओ और जीने दो*,*अहिंसा परमो धर्म की जय*,*श्री1008 महावीर भगवान की जय* या घोषणांनी परिसरात भक्तिमय वातावरण निर्माण केले. *चतुरबाई विद्यालयातील सहशिक्षिका प्रगती गांधी यांनी यावेळी भगवान महावीर यांच्या जीवन चरित्राचा परिचय विद्यार्थ्यांना करून दिला. तिसऱ्या महायुद्धाच्या उंबरठ्यावर उभ्या असलेल्या जगाला भगवान महावीरांच्या विचारांची गरज असल्याचे प्रतिपादन त्यांनी केले. तसेच भगवान महावीरांनी सांगितलेली *सत्य,अहिंसा,अस्तेय अपरिग्रह व ब्रह्मचर्य ही पंचतत्वे समजून घेऊन प्रत्येकाने जीवनात आचरणात आणण्याची गरज असल्याचे त्यांनी प्रतिपादन केले. जैन धर्मीय अनेकांतवाद, स्याद्वाद म्हणजे काय? हे विद्यार्थ्यांना त्यांनी अगदी सहज सोप्या,अमोघ वाणीने उलगडून दाखवले.*
तत्पूर्वी शाळा परिसरातील श्री 1008 भगवान महावीर मंदिरात सकाळी आठ वाजता भगवंतांचा पंचामृत अभिषेक सानंद संपन्न झाला. तदनंतर पाळणा सोहळ्यात महिला श्राविका मोठ्या संख्येने सहभागी होऊन भक्तीरसात न्हाऊन निघाल्या.
कार्यक्रमाचे सूत्रसंचालन सहशिक्षक वृषभ सोनटक्के तर आभार सुहास सुहास छंचुरे यांनी केले. यावेळी उमाबाई श्राविका विद्यालय व चतुरबाई श्राविका विद्यालयातील सर्व शिक्षक शिक्षकेतर कर्मचारी व विद्यार्थी मोठ्या संख्येने उपस्थित होते.
प्रशालेतील सर्व शिक्षक यांनी पांढरा पोशाख परिधान केला होता तर प्रशालेतील कलाशिक्षक प्रविण कंदले यांनी भगवान महावीरांचे काढलेले चित्र सर्वांचे आकर्षण ठरले
