सोलापूर – कॅन्सरसारख्या गंभीर आजाराचे प्रारंभिक टप्प्यात निदान झाल्यास उपचार अधिक प्रभावी ठरू शकतात. त्यामुळे ग्रामस्थांनी कॅन्सरचे वेळेत निदान करावे असे आवाहन सोलापूर जिल्हा परिषदेचे मुख्य कार्यकारी अधिकारी कुशल जैन यांनी केले. प्राथमिक आरोग्य केंद्र, माळीनगर येथे आज विशेष कॅन्सर व्हॅनद्वारे मोफत कॅन्सर जनजागृती व तपासणी शिबिराचे आयोजन करण्यात आले. यावेळी ते बोलत होते.
ग्रामीण भागात तज्ज्ञ वैद्यकीय सेवा उपलब्ध करून देणाऱ्या या उपक्रमाला नागरिकांचा उत्स्फूर्त प्रतिसाद लाभला. यावेळी प्रमुख उपस्थिती म्हणून मुख्य कार्यकारी अधिकारी कुशल जैन, जिल्हा आरोग्य अधिकारी डॉ. सतीश कोपूरवाड, तालुका आरोग्य अधिकारी डॉ. भाऊसाहेब जानकर आदींची उपस्थिती होती. शिबिराचे उद्घाटन फीत कापून करण्यात आले.
शिबिरामध्ये स्त्रीरोग तज्ज्ञ डॉ. स्वप्नाली चव्हाण यांनी महिलांची तपासणी करून स्तनाच्या कॅन्सरबाबत मार्गदर्शन केले, तर दंतरोग तज्ज्ञ डॉ. पोटे यांनी तोंडाच्या कॅन्सरची तपासणी करून नागरिकांना तंबाखूजन्य पदार्थांच्या दुष्परिणामांची माहिती दिली. कॅन्सरची लक्षणे, प्रतिबंधात्मक उपाययोजना आणि नियमित तपासणीचे महत्त्व याबाबतही उपस्थितांना मार्गदर्शन करण्यात आले.
शिबिरात तोंडाच्या कॅन्सरसाठी १४७ नागरिकांची तपासणी करण्यात आली. त्यापैकी एका व्यक्तीमध्ये संशयास्पद लक्षणे आढळून आल्याने पुढील उपचारांसाठी संदर्भित करण्यात आले. तसेच स्तनाच्या कॅन्सरसाठी ७८ महिलांची तपासणी करण्यात आली असून त्यापैकी दोन महिलांमध्ये संशयित लक्षणे आढळल्याने त्यांना पुढील तपासणी व उपचारासाठी पाठविण्यात आले.
विशेष म्हणजे, अशा शिबिरांमुळे कॅन्सरचे सुरुवातीच्या अवस्थेत निदान होण्यास मदत होत असून गंभीर आजारांचे प्रमाण कमी करण्यासाठी ही मोहीम प्रभावी ठरत आहे. तंबाखू, गुटखा आणि धूम्रपानामुळे तोंडाच्या कॅन्सरचा धोका वाढतो, तर महिलांनी स्तनातील गाठी किंवा इतर बदलांची नियमित स्व-तपासणी करून आवश्यकतेनुसार तातडीने वैद्यकीय सल्ला घ्यावा, असे आवाहन यावेळी करण्यात आले.
या शिबिरासाठी वैद्यकीय अधिकारी डॉ. अमेय फुले, डॉ. सागर मंगेडकर, डॉ. विवेकानंद उबाळे, समुदाय आरोग्य अधिकारी, आरोग्य सहाय्यिका, आरोग्य सेवक, आरोग्य सेविका, आशा गटप्रवर्तक व आशा सेविकांनी परिश्रम घेतले. ग्रामीण भागात कॅन्सरविषयी जागरूकता निर्माण करून नागरिकांचे आरोग्य सुदृढ राखण्याच्या दृष्टीने हा उपक्रम महत्त्वपूर्ण ठरल्याची भावना उपस्थितांनी व्यक्त केली.
