सोलापूर – कारखान्याच्या पत्र्यावर वेल्डिंगचे काम करीत असताना तोल जाऊन खाली पडल्याने एका 31 वर्षीय तरुण कामगाराचा मृत्यू झाल्याची घटना अक्कलकोट रोड एमआयडीसी येथील लेक एक्झीम या कारखान्यात 6 जून रोजी दुपारी चार वाजता घडली.
प्रवीण हणमंत अंजनाळकर (वय ३१ वर्ष, रा.समरा नगर, बसवेश्वर चौक, एमआयडीसी, सोलापूर ) असे त्या मयत कामगाराचे नाव आहे . प्रवीण हा मागील अनेक वर्षापासून एमआयडीसी येथील लेक एक्झीम या कारखान्यात कामाला होता .नेहमीप्रमाणे शनिवारी ही तो कामावर आला होता . त्यानंतर दुपारी घरात जेवण करून तो कामावर आला होता .दुपारी चार वाजेच्या सुमारास तो कारखान्याच्या पंधरा ते वीस फुटावरील पत्र्यावर चढून काम करीत असताना अचानक जाऊन तो खाली पडला . यात डोक्याला गंभीर दुखापत होऊन तो जागेवर बेशुद्ध होऊन पडला .त्याला त्वरित उपचारासाठी सोलापूर मार्कंडेय रुग्णालयात सायंकाळी पावणे पाच वाजता दाखल करण्यात आले असता डॉक्टरांनी त्याला मृत घोषित केले. त्यानंतर सदरचा मृतदेह शव विच्छेदनासाठी येथील शासकीय रुग्णालयात संध्याकाळी दाखल करण्यात आला . दरम्यान घटनेची माहिती समजतात नातेवाईक व मित्रांनी शासकीय रुग्णालयात मोठी गर्दी केली होती. मयत प्रवीण याच्या मागे आई-वडील, पत्नी, दोन मुले आणि भाऊ असा परिवार असल्याची माहिती नातेवाईकांनी दिली .
