टीम इंडियाचे अजून काही ठरले नाही, काय आहे रोहित शर्माचा गेम प्लॅन? समोर आली धक्कादायक माहिती

आयसीसी वर्ल्डकपसाठी फक्त ७ दिवस शिल्लक आहेत आणि संभाव्य विजेता म्हणून ज्या भारतीय संघाची चर्चा सुरू आहे त्याबाबत एक मोठी अपडेट समोर आली आहे.

वेस्ट इंडिज दौरा त्यानंतर आशिया कप २०२३ आणि त्यानंतर ऑस्ट्रेलियाविरुद्ध विजय मिळवल्यानंतर आता भारतीय संघ आयसीसी वनडे वर्ल्डकपसाठी सज्ज झाला आहे. रोहित शर्मा प्रथमच वनडे वर्ल्डकपमध्ये नेतृत्व करत आहे. २०११ नंतर भारतात वर्ल्डकप होत आहे आणि यावेळी देखील भारत वर्ल्डकप जिंकण्यास उत्सुक आहे.वर्ल्डपकमध्ये भारताची पहिली लढत ८ ऑक्टोबर रोजी चेन्नईत ऑस्ट्रेलियाविरुद्ध आहे. पण वर्ल्डकप सुरू होण्याआधी असे पाच प्रश्न आहेत ज्याची उत्तरे टीम इंडियाला मिळणे गरजेचे आहे. जर भारताला या प्रश्नाची उत्तरे मिळाली तर वर्ल्डकप देखील मिळाला असे म्हणता येईल.

भारताचे मुख्य प्रशिक्षक राहुल द्रविड आणि कर्णधार रोहित शर्मा यांनी वर्ल्डकप २०२३च्या आधी इतके प्रयोग केले आहेत की भारतीय चाहत्यांमध्ये गोंधळाचे वातावरण आहे. भारत नेमक्या कोणत्या ११ खेळाडूंना मैदानात उतरवणार याचे उत्तर कोणाकडेच नाही. वर्ल्डकपच्या आधी झालेल्या वेस्ट इंडिज, आशिया कप आणि ऑस्ट्रेलियाविरुद्धच्या मालिकेत भारताने प्रयोग केले होते.

१) विकेटकीपर कोण?
संघात होणारा सर्वात मोठा प्रयोग म्हणजे विकेटकीपर बाबत होय. ईशान किशन हा चांगला विकेटकीपर आहे. पण केएल राहुलची फिटनेस चेक करण्यासाठी ईशानच्या जागी आशिया कपमध्ये राहुलकडे ही जबाबदारी दिली. त्यानंतर ऑस्ट्रेलियाविरुद्ध झालेल्या वनडेतील पहिल्या सामन्यात राहुलने अनेक चुका केल्या. या सामन्यातील अनेक चुका वर्ल्डकपमध्ये केल्यास भारताला महागात पडू शकते.

२) ऑफ स्पिनर नाही
आयसीसीने संघात बदल करण्याची मुदत २८ सप्टेंबर ही दिली आहे. कोणताही देश संघात ३ बदल करू शकतात, त्यासाठी आयसीसीची परवानगी घ्यावी लागले. आता टीम इंडियात अक्षर पटेल याला दुखापत झाली आहे, त्यामुळे त्याच्या जागी आर अश्विन आणि वॉशिंग्टन सुंदर यांना ऑस्ट्रेलियाविरुद्ध संधी मिळाली होती. भारताच्या वर्ल्डकप संघात एकही ऑफ स्पिनर नाही. फिरकीपटूंना अनुकूल असलेल्या पिचवर ऑफ स्पिनर असणे गरजेचे आहे. भारताविरुद्ध झालेल्या तिसऱ्या वनडेत ऑफ स्पिनर ग्लेन मॅक्सवेलने ४ विकेट घेतल्या होत्या. जर एक पार्ट टाइम गोलंदाज अशी कामगिरी करू शकतो तर भारताचा अनुभवी गोलंदाज किती चांगली कामगिरी करू शकतो असा सवाल उपस्थित होत आहे.

३) अंतिम ११ कोण?
वर्ल्डकपमध्ये भारताची प्लेइंग इलेव्हन कोणती असणार हे अद्याप ठरले नाही. गेल्या काही वनडे सामन्यात भारताने सातत्याने संघ बदलला आहे. रोहित शर्माने संघात लवचिकता हवी असे म्हटले असले तरी सतत केला जाणारा हा बदल टीम इंडियाच्या अंगलट येऊ नये.

४) डाव्या हाताचा एकही जलद गोलंदाज नाही

भारतीय संघात जसप्रीत बुमराह, मोहम्मद शमी, मोहम्मद सिराज आणि शार्दुल ठाकूर सारखे जलद गोलंदाज आहेत. त्याच बरोबर हार्दिक पंड्या हा देखील पर्याय आहे. पण टीममध्ये एकही डाव्या हाताने जलद गोलंदाज नाही. २०११च्या वर्ल्डकप विजेत्या संघात झहीर खान आणि आशिष नेहरा सारखे गोलंदाज होते. झहीरने ९ सामन्यात २१ विकेट घेतल्या होत्या.

५) प्रयोग सुरूच ठेवणार का?
कोच द्रविड आणि कर्णधार रोहित शर्मा यांचे प्रयोग वर्ल्डकपमध्ये देखील सुरूच राहणार का या प्रश्नाचे उत्तर कोणाकडेच नाही. ऑस्ट्रेलियाविरुद्धच्या तिसऱ्या वनडेत सलामीवीर म्हणून वॉशिंग्टन सुंदरला पाठवण्यात आले होते. सुंदर हा वर्ल्डकप संघात देखील नाही. वर्ल्डकपच्या आधी भारताने फलंदाजीच्या क्रमात सातत्याने बदल केले होते. आता या सर्व प्रश्नांची उत्तरे ८ तारखेला ऑस्ट्रेलियाविरुद्धच्या सामन्यात मिळण्याची शक्यता आहे.