कोणत्याही राजकीय निवडणुकीत जितकी चुरस असते तितकीच किंबहुना त्याही पेक्षा जास्त चुरस अखिल भारतीय मराठी नाट्य परिषदेच्या निवडणुकीत निर्माण झाली होती. रविवारी म्हणजे काल मतदान झाले. त्यानंतर लगेचच मतमोजणी सुरू झाली. सोमवारी पहाटेपर्यंत मतमोजणी सुरू होती. मतमोजणी पूर्ण झाल्यानंतर या निवडणुकीत प्रशांत दामले यांच्या ‘रंगकर्मी नाटक समूह’ पॅनलचा दणदणीत विजय झाला. तर नवनाथ कांबळी (प्रसाद कांबळी) यांच्या आपलं पॅनल पराभूत झालं.
अखिल भारतीय मराठी नाट्य परिषदेच्या निवडणुकीमध्ये यंदा प्रशांत दामले विरुद्ध प्रसाद कांबळी यांच्यात थेट लढत होती. त्यातच निवडणुकीत राजकीय हस्तक्षेपही झाल्यानं ती अधिक चुरशी झाली होती. त्यामुळे सर्वांचं लक्ष या निवडणुकीच्या निकालाकडे लागले होते. या निवडणुकीत मुंबई मध्यवर्ती शाखेतील दहा जागांपैकी ८ जागांवर दामले यांच्या रंगकर्मी नाटक समूहाचे उमेदवार निवडून आले. तर उर्वरीत दोन जागांवर प्रसाद कांबळी यांच्या आपलं पॅनलचे दोन उमेदवार निवडून आले. मुंबई मध्यवर्तीत शाखेत एकूण १,३२८ जणांनी मतदान केलं. त्यात माटुंगा इथल्या यशवंत नाट्य मंदिरात १,२४५ तर गिरगांव इथं ८३ जणांनी मतदान केलं. मुंबई उपनगर शाखा (मुलुंड – बोरिवली- वसई) इथं एकूण ७३० जणांनी मतदान झाले.
‘रंगकर्मी नाटक समूहा’कडून प्रशांत दामले (७५९), विजय केंकरे (७०५), विजय गोखले (६६४), सयाजी शिंदे (६३४), सुशांत शेलार (६२३), अजित भुरे (६२१) , सविता मालपेकर (५९१), वैजयंती आपटे(५९०) भरघोस मतांनी विजयी झाले. तर आपलं पॅनल मधून प्रसाद कांबळी (५६५) आणि अभिनेत्री सुकन्या मोने (५६७) विजयी झाल्या.
करोनामुळे झालल्या लॉकडाऊनच्या काळात अनेक नाट्यकर्मींना, नाट्यसंस्थांना मोठा आर्थिक फटका बसला होता. याच आर्थिक फटक्याला अखिल भारतीय मराठी नाट्यपरिषदेला देखील सामोरे जावे लागले आहे. गेल्या अनेक वर्षांत नाट्यपरिषद आणि वाद हे न संपणारे समीकरण झाले होते. किमान आता तरी हे समीकरण बदलेल अशी अपेक्षा नाट्यवर्तुळातून व्यक्त होत आहे.
