पुण्याच्या हडपसर परिसरात ट्रकचं स्टेअरिंग तुटल्याने भीषण अपघात झाला. यावेळी ट्रकच्या माग अति जड लोखंडी पाईप हे पुढे सरकले आणि केबिनचा चेंदामेंदा झाला
लोखंडी पाईप घेऊन जाणाऱ्या ट्रकचा स्टेअरिंग तुटल्याने ट्रक चालकाने उड्डाणपूल सुरू होणाऱ्या दुभाजकाला धडक दिली. त्यामुळे ट्रकच्या मागे असलेले अति जड लोखंडी पाईप हे पुढे सरकले आणि केबिनचा चेंदामेंदा झाला. पुण्यातील हडपसर परिसरात हा धडकी भरवणारा अपघात घडला आहे. यामध्ये ट्रकच्या केबिनचा अक्षरश: चक्काचूर झाला. फोटो पाहून या अपघाताची भीषणता किती असेल हे दिसते.
या भीषण अपघातात ट्रक चालकाचा पाय तुटला असून क्लिनर जखमी झाला आहे. नागरिकांनी तात्काळ क्लिनर आणि ट्रक चालकाला ट्रकमधून बाहेर काढून रुग्णालयात दाखल केले. प्रमाणापेक्षा जास्त लोड असल्यामुळे हा अपघात झाला, असं प्रत्यक्षदर्शी नागरिक उल्हास तुपे यांच्याकडून सांगण्यात आले आहे. वैभव थिएटरसमोर सोलापूर रोड हडपसर येथे हा अपघात आज पहाटे घडला असल्याची माहिती आहे. घटनास्थळी पोलिस दाखल झाले असून ट्रक रस्त्यावरून बाजूला हटवला आहे. चालक क्लिनर जखमी असून त्यांची अद्याप ओळख पटू शकली नाही. या घटनेने काही काळ वाहतूक खोळंबली होती.
