बंजारा समाजाचे पवित्र तीर्थक्षेत्र असलेल्या पोहरादेवी व उमरी येथे तीर्थक्षेत्र विकास आराखड्याअंतर्गत विकास कामांना सुरुवात झाली आहे. या तीर्थक्षेत्राचा विकास करतांना बंजारा समाजाच्या सर्वांगीण विकासासाठी कटिबद्ध असल्याची ग्वाही पालकमंत्री संजय राठोड यांनी दिली.
पोहरादेवी येथे पोहरादेवी-उमरी तीर्थक्षेत्र विकास आराखड्यातील पोहरादेवी विकास कामातील संत सेवालाल महाराज मंदिराची पायाभरणी कार्यक्रमाच्या अध्यक्षस्थानावरून पालकमंत्री राठोड बोलत होते. बंजारा धर्मगुरू बाबुसिंग महाराज व कबीरदास महाराज यांच्या हस्ते मंदिराची पायाभरणी करण्यात आली.
पालकमंत्री राठोड म्हणाले की, मुंबई येथ बंजारा भवनासाठी मुख्यमंत्री शिंदे यांनी 3 एकर जमीन उपलब्ध करून दिली आहे. पोहरादेवीसाठी आज आनंदाचा क्षण आहे.आजच्या कार्यक्रमातून संत सेवालाल महाराज मंदिराची पायाभरणी करण्यात आली. उमरी येथे तीर्थक्षेत्र विकास कामांना सुरुवात झाली आहे.संत रामराव महाराजांचे स्वप्न होते की,पोहरादेवी-उमरी तीर्थक्षेत्राचा विकास झाला पाहिजे. तसेच राज्याच्या बाहेर असलेल्या बंजारा तीर्थक्षेत्राचा देखील विकास झाला पाहिजे.एवढंच नव्हे तर समाजाचा देखील विकास झाला पाहिजे हा संत रामराव महाराजांचा ध्यास होता.पोहरादेवी-उमरी तीर्थक्षेत्र विकास आराखड्यातील कामे सुरू झाल्याने संत रामराव महाराजांचे स्वप्न पूर्ण होत असल्याचे ते म्हणाले.
भायागड,सेवागड व पोहरागड हा बंजारा तीर्थक्षेत्र कॅरीडॉर तयार झाला पाहिजे असे सांगून पालकमंत्री राठोड म्हणाले,बंजारा समाजाचे अनेक प्रश्न आहेत,त्याची सोडवणूक करण्यासाठी समाजातील लोकप्रतिनिधींनी पुढाकार घेतला पाहिजे. बंजारा समाजातील विद्यार्थ्यांच्या शैक्षणिक विकासाला गती मिळणार आहे.सुरूवातीला 10 जिल्ह्यात विद्यार्थ्यांसाठी वसतिगृहे सुरू होत आहे.मुलामुलींसाठी स्पर्धा परीक्षा मार्गदर्शन केंद्र सुरू करण्यात येणार आहे.वसंतराव नाईक आर्थिक विकास महामंडळासाठी 1500 कोटी रुपयांचा निधी उपलब्ध करून देण्याचा निर्णय शासनाने घेतला आहे. 700 कोटी रुपये तांडा वस्ती विकासासाठी शासनाने मंजूर केले आहे.वनार्टी ही स्वायत्त संस्था बार्टीच्या धर्तीवर सुरु करण्यात येणार आहे.पोहरादेवी किंवा मानोरा येथे शासकीय वैद्यकीय महाविद्यालय सुरू होण्यासाठी आपण प्रयत्नशील असल्याचे त्यांनी सांगितले.
केवळ धार्मिक स्थळ म्हणून पोहरादेवीचा विकास न करता पर्यटन व शैक्षणिक विकासाला देखील गती देणार असल्याचे सांगून पालकमंत्री राठोड म्हणाले,इथल्या सामाजिक, कृषी व आरोग्य क्षेत्राकडे आपले लक्ष राहणार आहे.इथल्या विकासासाठी महंत सोबत आहे.समाज एकत्र असला की शक्ती निर्माण होते,ही शक्तीच समाजाचे प्रश सोडविण्याचे बळ देते.वसंतराव नाईक यांचे शिक्षण झालेल्या विठोली येथील शाळेच्या विकासाकडे लक्ष देणार असल्याचे राठोड यावेळी म्हणाले.
तर खासदार जाधव म्हणाले की,देशात विविध देवस्थानाच्या विकास होत असताना पालकमंत्री संजय राठोड यांच्या माध्यमातून बंजारा समाजाच्या तीर्थक्षेत्राचा विकास करण्यात येत आहे.देशातील बंजारा समाज एकत्र आला पाहिजे.पोहरादेवी येथे शासकीय वैद्यकीय महाविद्यालय सुरू करण्यासाठी आपण केंद्र सरकारकडे पाठपुरावा करणार असल्याचे त्यांनी सांगितले. सत्करमूर्ती माजी आमदार अनंतकुमार पाटील म्हणाले, बंजारा समाजाला पुर्वी स्वातंत्र्य नव्हते. स्वातंत्र्यानंतर या समाजात मोठा बदल झाला. समाजातील अंधश्रध्दा दूर करण्याचे काम जेतालाल महाराजांनी केले. भारतातील मंदिरे आपल्यासाठी बंद होते. पोहरादेवीचे मंदिर गेल्या 500 वर्षांपासून सर्वांसाठी खुले आहे. इतिहासात मोठे काम पोहरादेवीत झाले.आपल्याला अज्ञानाकडून विज्ञानाकडे जायचे आहे. वसंतराव नाईक,सुधाकरराव नाईक व संत रामराव महाराजांनी समाजाची प्रगती केली. पोहरादेवीत इंग्रजी शाळा व इंजिनिअरिंग कॉलेज सुरू झाले पाहिजे असे त्यांनी सत्काराला उत्तर देतांना सांगितले.
