बुलढाणा : बुलढाणा जिल्ह्यातील खामगाव शेगाव परिसरात एक व्यक्ती श्री. गजानन महाराजांचे वेष धारण करून संचार करत असल्याचे पाहायला मिळत आहे. हुबेहूब गजानन महाराजांसारखी दिसणारा हा व्यक्ती कोण आहे? असा प्रश्न अनेकांना पडला आहे. दरम्यान, आज हा व्यक्ती गजानन महाराजांच्या वेशात फिरत असताना काही युवकांनी या व्यक्तीला मारहाण करण्याचा प्रयत्न केला.
हा व्यक्ती स्वतःला वाचवत असतानाचा एक व्हिडिओ सोशल मीडियावर व्हायरल झाला आहे. या व्यक्तीकडे लातूर जिल्ह्यातील घुग्गी येथील शेषराव रामराव बिराजदार नामक व्यक्तीचे बँक पासबुक देखील सापडले आहे. मात्र, अद्याप पोलिसांनी गजानन महाराजांच्या वेशात फिरणाऱ्या या व्यक्तीची साधी चौकशी देखील केलेली नाही. त्यामुळे बुलढाणा जिल्ह्यातील पोलीस यंत्रणा एखाद्या मोठ्या अनुचित प्रकाराची वाट पाहत आहे की काय? असा प्रश्न उपस्थित होत आहे. पोलिसांनी वेळीच या व्यक्तीला ताब्यात घेऊन तो गजानन महराजांच्या वेशात का फिरत आहे? आणि आपण स्वतः गजानन महाराज असल्याचं का म्हणत आहे? याचाही शोध घेतला पाहिजे.
काही दिवसांपूर्वी बुलढाणा जिल्ह्यातील खामगाव येथे विदर्भातील प्रसिद्ध संत श्री. गजानन महाराजांची वेशभूषा धारण करून त्यांच्यासारखा दिसणारा अवलियाला प्रकटला असल्याचा धक्कादायक प्रकार समोर आला होता. या व्यक्तीचा शोध लागला असून त्याची शेगाव तालुक्यातील जवळा बुद्रुक येथील पोलीस पाटलांनी झाडाझडती घेतल्याची माहिती मिळाली आहे. सदरचा हा बहुरूपी महाराष्ट्रातील लातूर जिल्ह्याचा रहिवासी असल्याचंही विश्वसनीय माहिती मिळाली आहे.
बुलढाणा : बुलढाण्यात गजानन महाराज बनून फिरणाऱ्या अवलियाला मारहाण, धक्कादायक Video व्हायरल pic.twitter.com/SN8H81RWhV
— Maharashtra Times (@mataonline) October 5, 2023
