राज्याच्या राजकारणाच्या दृष्टीनं आजचा दिवस महत्त्वाचा आहे. आमदार अपात्रतेचा निकाल आज जाहीर होईल. विधानसभा अध्यक्ष निकाल जाहीर करतील. याकडे राज्यासह देशाचं लक्ष लागलं आहे.
राज्याच्या राजकारणात आज महत्त्वाचा दिवस आहे. आमदार अपात्रतेचा निकाल आज देण्यात येईल. विधानसभेचे अध्यक्ष राहुल नार्वेकर याबद्दल निर्णय देतील. या निकालाकडे राज्यासह देशाचं लक्ष लागलं आहे. विधानसभा अध्यक्षांनी एकनाथ शिंदे आणि त्यांच्या गटातील आमदारांना अपात्र ठरवल्यास मुख्यमंत्रिपदाची जबाबदारी कोणाकडे जाणार याबद्दल चर्चा सुरू आहे. सरकारला कोणताही धोका नसल्याचं भाजपकडून सांगितलं जात आहे.
निर्णय काहीही आला तरी आमचं सरकार स्थिर राहील, असं उपमुख्यमंत्री आणि भाजप नेते देवेंद्र फडणवीस कालच म्हणाले. आमची युती कायदेशीर रुपात वैध आहे. विधानसभा अध्यक्षांचा निकाल आमच्या बाजूनं येईल अशी आशा आहे, असं फडणवीस म्हणाले. उपमुख्यमंत्र्यांची विधानं पाहता शिंदेंविरोधात निकाल आल्यास भाजप प्लान बी सुरू करेल ही बाब स्पष्ट आहे.
२० जून २०२२ रोजी एकनाथ शिंदेंनी बंड केलं. त्यांना शिवसेनेच्या ४० आमदारांनी साथ दिली. राज्यातील ठाकरे सरकार कोसळलं. शिंदेंचा गट भाजपसोबत गेला आणि राज्यात सत्तापालट झाला. शिंदे मुख्यमंत्री, तर फडणवीस उपमुख्यमंत्री झाले. हे प्रकरण सर्वोच्च न्यायालयात पोहोचलं. न्यायालयानं निकाल देण्यासाठी आधी ३१ डिसेंबर २०२३ ची डेडलाईन दिली. त्यानंतर १० दिवसांची मुदत देण्यात आली. ती आज संपत आहे.
विधानसभा अध्यक्षांनी दोन्ही गटांची सुनावणी घेतली आहे. कायदेतज्ज्ञांसोबत चर्चा झालेली आहे. अपात्रतेशी संबंधित याचिकेवर आज संध्याकाळी ४ पर्यंत येऊ शकतो. कायदेतज्ज्ञांनुसार शिंदे गटाविरोधात निकाल गेल्यास मुख्यमंत्री शिंदे, त्यांच्या गटातील मंत्री आणि आमदारांना तातडीनं राजीनामा द्यावा लागेल. तांत्रिकदृष्ट्या सरकारवरही संकट येईल.
यानंतर नवीन सरकार स्थापन करण्याच्या हालचाली सुरू होतील. भाजप युतीकडे बहुमत असेल. काही महिन्यांपूर्वीच अजित पवारांचा गट भाजपसोबत आला आणि सत्तेत सहभागी झाला. आपल्यासोबत ४० आमदार असल्याचा अजित पवारांचा दावा आहे. विधानसभेच्या एकूण २८८ जागा आहे. बहुमतासाठी १४५ आमदारांचा पाठिंबा गरजेचा असतो. २०१९ मध्ये भाजपनं १०५ जागा जिंकल्या होत्या. त्यात अजित पवारांचा गट, सरकारला पाठिंबा देणारे छोटे पक्ष आणि काही अपक्ष आमदार यांची बेरीज केल्यास बहुमत सिद्ध होईल.
शिंदे जरी अपात्र ठरले तरी राज्यात पुन्हा एकदा महायुतीचं सरकार येईल. पण मुख्यमंत्री नवा असेल. अशा परिस्थितीत अजित पवारांचा गट वरचढ ठरू शकतो. भाजप अजित पवारांकडे राज्याचं नेतृत्त्व देऊ शकतो. राज्यातील सरकारकडे काही महिन्यांचाच अवधी शिल्लक राहिला आहे. त्यामुळे पवारांकडे मुख्यमंत्रिपद दिलं जाऊ शकतं.
शिंदे गट अपात्र ठरल्यास अजित पवार गटाचीदेखील धाकधूक वाढू शकते. विधानसभा अध्यक्ष पुढे याच धर्तीवर निकाल देऊ शकतात. याठिकाणी आणखी एक मु्द्दादेखील महत्त्वाचा ठरतो. आमदारांची संख्या जास्त असल्यानं शिंदेंच्या गटाला पक्षाचं नाव आणि चिन्ह देण्यात आलं होतं. हाच तर्क विधानसभा अध्यक्ष देऊ शकतात. निवडणूक आयोगाच्या निकालाच्या आधारे कोणत्याही सदस्याला अपात्र ठरवलं जाऊ शकत नाही, असा निर्णय विधानसभा अध्यक्षांकडून दिला जाऊ शकतो.
