माढा लोकसभा मतदारसंघात भाजपने रणजितसिंह नाईक निंबाळकर यांना उमेदवारी जाहीर केल्याने माजी उपमुख्यमंत्री विजयसिंह मोहिते पाटील हे नाराज झाल्याची चर्चा सुरू आहे. रविवारी दिवसभर अकलूज येथील शिवरत्न बंगल्यावर नेत्यांच्या बैठकीचा सपाटा सुरू होता. रविवारी सायंकाळी ग्रामविकास मंत्री गिरीश महाजन हे शिवरत्न बंगल्यावर आले असता, हजारो मोहिते पाटील समर्थकांनी घेराव घालण्याचा प्रयत्न केला. धैर्यशील मोहिते पाटील यांना माढा लोकसभा मतदारसंघातून भाजपने उमेदवारी द्यावी अशी प्रमुख मागणी करण्यात आली.
गिरीश महाजन रविवारी सायंकाळी शिवरत्न बंगल्यातून बाहेर जाताना हजारो मोहिते पाटील समर्थकांनी जोरदार घोषणाबाजी करत गिरीश महाजन यांच्या वाहनाला अडवले. “माढा, निंबाळकरांना पाडा” अशा घोषणा देण्यात येत होत्या. गिरीश महाजन यांचे वाहन जवळपास अर्धा तास शिवरत्न बंगल्या बाहेर थांबून होते. रणजितसिंह मोहिते पाटील यांनी कार्यकर्त्यांशी संवाद साधून समजूत घालून गिरीश महाजन यांना रवाना केले.
धैर्यशील मोहिते पाटलांचा पत्ता कट
भारतीय जनता पार्टीने ऐनवेळी धैर्यशील मोहिते पाटील यांचा पत्ता कट करत रणजितसिंह निंबाळकर यांना उमेदवारी दिली आहे. निंबाळकर यांना उमेदवारी जाहीर झाल्याने अकलूज, माळशिरसमध्ये रणजितसिंह नाईक निंबाळकर यांच्या विरोधात राजकीय वातावरण तयार झाले आहे.
माढा लोकसभा मतदारसंघात अकलूज, माळशिरस या भागातून २०१९ मध्ये एक लाख मतांचे लीड मिळाले होते. भाजपला आता या भागातून लीड मिळण्याची शक्यता नाकारली जात आहे. धैर्यशील मोहिते पाटील, विजयसिंह मोहिते पाटील तुतारी चिन्ह घेऊन निवडणुकीच्या रिंगणात उतरण्याची शक्यता वर्तवली जात आहे.
शरद पवारांनी देखील विजयसिंह मोहिते पाटील यांची भेट घेतल्याची चर्चा राजकीय वर्तुळात केली जात आहे. माढा लोकसभा मतदारसंघात तुतारी चिन्ह घेऊन धैर्यशील मोहिते पाटील निवडणुकीच्या रिंगणात उतरले तर भाजप आणि तुतारीत चुरशीची लढत होईल.
रविवारी शिवरत्न बंगल्यात झालेल्या राजकीय हालचालीवरून असे निदर्शनास येत आहे, आगामी लोकसभा निवडणुकीत धैर्यशील मोहिते पाटील तुतारी चिन्हासह माढा निवडणुकीच्या रिंगणात उतरतील.
रविवारी दिवसभर झालेल्या बैठकीत महाविकास आघाडीच्या नेत्यांनी भेट घेतली आहे. माजी उपमुख्यमंत्री विजयसिंह मोहिते पाटील यांनी रविवारी लावलेल्या बैठकीला विधान परिषदेचे माजी सभापती रामराजे नाईक निंबाळकर, त्यांचे बंधू संजीवराजे नाईक निंबाळकर, रघुनाथराजे नाईक निंबाळकर, सातारा जिल्हा मध्यवर्ती सहकारी बँकेचे उपाध्यक्ष अनिल देसाई, शेतकरी कामगार पक्षाचे सरचिटणीस आमदार जयंत पाटील, आमदार दीपक चव्हाण, माजी आमदार नारायण पाटील, सांगोल्याचे शेकाप नेते डॉ. बाबासाहेब देशमुख हे उपस्थित होते.
