माढा – सीना माढा उपसा जलसिंचन योजनेच्या मुख्य कालव्याच्या अस्तरीकरणाचे काम निकृष्ट दर्जाचे झाले असुन सदर कामाची सखोल चौकशी करून याचा सविस्तर अहवाल वरिष्ठांकडे सादर करण्याच्या सूचना आमदार अभिजित पाटील यांनी सोमवारी पिंपळनेर येथे या कामाची पाहणी करताना उजनी धरण व्यवस्थापन विभागाच्या कार्यकारी अभियंता एस यू डुंबरे यांना दिल्या आहेत.
सीना माढा उपसा जलसिंचन योजनेच्या मुख्य कालव्याच्या अस्तरीकरणाचे काम निकृष्ट दर्जाचे झाले असल्याने पहिल्याच पावसात हे काम अनेक ठिकाणी उचकटले आहे सुमारे १८ कि मी लांबीच्या या कामासाठी सुमारे ७० कोटी रुपये खर्च झाले असल्याचे ही आ.पाटील यांनी सांगितले.
आमदार अभिजित पाटील यांनी या कामाची पाहणी करून हे काम अंदाजपत्रकानुसार योग्य दर्जाचे झाले नाही सिमेंटचे प्रमाण त्याची ग्रेड याबाबत सखोल चौकशी करून संबंधित ठेकेदारावर कारवाई करावी तसेच हे काम पुन्हा करावे लागणार असल्याने याबाबतचा सविस्तर अहवाल वरिष्ठांकडे सादर करा अशा सूचना अधिकाऱ्यांना दिल्या आहेत.
कृषीनिष्ठ परिवाराचे नितीन कापसे यांच्या नेतृत्वाखाली शेतकऱ्यांनी या कालव्यात उतरून आंदोलन करण्याचा इशारा दिला होता.
सकाळी ९ वाजता येथे मोठ्या संख्येने शेतकरी उपस्थित झाले होते यावेळी नितीन कापसे यांनी आमदार अभिजित पाटील आणि कार्यकारी अभियंता एस यू डुंबरे यांना केलेल्या कामाची दुरावस्था कालव्यात उतरून दाखवली या दुराव्यस्थेमुळे पाण्याचा अपव्यय होतो आहे त्याच बरोबर लगतच्या शेतीला चिबड लागल्याने शेती नापिक होण्याची भिती व्यक्त केली. याबाबत येत्या पंधरा दिवसांत कारवाई न झाल्यास कृषीनिष्ठ परिवार तीव्र आंदोलन करेल असा इशारा दिला आहे.
उजनी धरण व्यवस्थापन विभागाच्या कार्यकारी अभियंता एस यू डुंबरे यांनी सांगितले या कामाचा ठेका आय व्ही कॉन कन्स्ट्रक्शन कंपनीस दिलेला आहे टेंडर मध्ये या कामाच्या देखभाल दुरुस्ती चा समावेश आहे आणि त्याची मुदत असल्याने हे काम पुन्हा करून घेतले जाईल कामाची गुणवत्ता तपासून ठेकेदारावर कारवाई केली जाईल या कामाचे अंतिम बील अदा करण्यात आले नाही.
यावेळी नितीन कापसे,तानाजी मोटे,अरुण पाटील, नाना लोंढे, रघुनाथ फुगे, रूपचंद्र लोंढे,विक्रम फुगे,यांच्या सह मोठ्या संख्येने शेतकरी उपस्थित होते.
