पंढरपूर – कार्तिकी यात्रेचा सोहळा सुरु झाला आहे. त्यामुळे पंढरपूर शहर परिसरामध्ये मोठ्या प्रमाणात भाविकांची गर्दी असते. या गर्दीमध्ये घरगुती सिलेंडरचा अवैद्यरित्या वापर केल्यास मानवी जीवित हानी होण्याची शक्यता आहे. ही बाब लक्षात घेऊन दि.२८ रोजी तहसीलदार सचिन लंगुटे यांच्या मार्गदर्शनाखाली पंढरपूर शहरात अवैधरित्या घरगुती गॅसचा हॉटेलमध्ये वापर होत असल्याच्या ठिकाणी कारवाई करण्यात आली. या मध्ये घरगुती गॅस सिलेंडरचा वापर व्यावसायीक कामासाठी करताना जप्त करण्यात आले तर व्यावसायीक वापरातील तीन गॅस सिलेंडर जप्त करण्यात आले आहेत.
कार्तिकी यात्रेच्या पार्श्वभुमिवर पुरवठा निरीक्षक विजय बादल, पोलीस उपनिरीक्षक श्री.पिसाळ तसेच पुरवठा शाखेतील महसूल सहाय्यक उमेश हिंगमिरे, नेताजी ओव्हाळ यांच्या संयुक्त पथक कार्यरत आहे. पंढरपूर शहरातील मंदिर परिसर, प्रदक्षणा मार्ग, उज्वला सेतू लगत, गजानन महाराज मठालगत घरगुती वापरातील गॅस सिलेंडरचा वापर करणाऱ्या हॉटेल मधून घरगुती वापरातील एकूण सात सिलेंडर जप्त करण्यात आले आहेत. तर व्यावसायिक वापरातील तीन गॅस सिलेंडर जप्त करण्यात आले आहेत.
कार्तिकी यात्रेत येणारे लाखोंच्या संख्येने भाविक पाहता पंढरपूर शहर व परिसरातील हॉटेल विक्रेते यांना घरगुती गॅसचा वापर न करता व्यावसायिक गॅस सिलेंडरचा वापर करण्याचे प्रशासनामार्फत आवाहन करण्यात आले.
