मुंबई – कर्तव्यावर असताना मद्यप्राशन करून कामात हलगर्जीपणा व धिंगाणा घालणाऱ्या अमरावती विभागातील परतवाडा आगार व्यवस्थापक जीवन दत्तात्रय वानखेडे यांना एसटी महामंडळाच्या प्रादेशिक व्यवस्थापकांनी निलंबित केले आहे. त्यांची विभागीय चौकशी करून दोषी आढळल्यास त्यांना सेवेतून बडतर्फ करण्याची कारवाई सुरू करण्यात येणार आहे.
अमरावती विभागातील परतवाडा आगाराचे आगार व्यवस्थापक हे दिवसभर आपल्या कर्तव्यावर उपस्थित न राहता मद्यप्राशन करून आपल्या शासकीय निवासस्थानी अत्याव्यस्थ अवस्थेत पडले आहेत. अशी माहिती एस टी महामंडळाच्या सुरक्षा व दक्षता विभागाला आगारातील कर्मचाऱ्यांनी दूरध्वनीवरून कळवली होती. त्यानुसार तेथे एसटी महामंडळाच्या सुरक्षा व दक्षता विभागाने छापा टाकला असता उपरोक्त तक्रारीमध्ये तथ्य आढळले. एसटीच्या सुरक्षा व दक्षता अधिकाऱ्यांनी आगार व्यवस्थापक जीवन वानखेडे यांची अचलपूर उपजिल्हा रुग्णालयामध्ये वैद्यकीय तपासणी करून घेतली आणि त्यांच्या विरोधात परतवाडा पोलीस स्थानकामध्ये *महाराष्ट्र दारुबंदी अधिनियम १९४९ मधील कलम ८५(१)* नुसार गुन्हा नोंद केला.
सुरक्षा व दक्षता विभागाने केलेल्या तपासणीमध्ये संबंधित आगार व्यवस्थापक हे दिवसभर मद्यप्राशन करून आपल्या आगारात उपस्थित न राहता बाहेर फिरत होते. त्यामुळे आगारातील दैनंदिन वाहतूक विस्कळीत झाली. त्यांच्या कर्तव्यातील हलगर्जीपणामुळे अनेक मार्गावरील बसेस रद्द झाल्या . त्यामुळे एसटी महामंडळाचे आर्थिक नुकसान तर झालेच परंतु आपल्या शासकीय निवासस्थानी व आगारात मद्यप्राशन करून गैरवर्तन केल्याबद्दल जन माणसात एसटी महामंडळाची प्रतिमा मलिन झाली. असा निष्कर्ष काढून त्यांच्यावर रितसर गुन्हा नोंद करण्यात आलेला आहे.
