नांदेड / माहूर – राज्यातील प्रसिद्ध तीर्थक्षेत्रासह निसर्गरम्य पर्यटनस्थळ असलेले श्री क्षेत्र माहूरगड हे देवदर्शनासाठी येणाऱ्या लाखों भाविकासह पर्यटकांना आकर्षित करणारे धार्मिक स्थळासह ऐतिहासिक शहर व तालुका परिसर असल्याने येथे भाविक व पर्यटकांसह ‘अघोरी प्रकार करणारे गुप्तधनाच्या शोधात अनेक हौसे-गौसे-नौसे सुद्धा मोठ्या संख्येने येत असतात. तालुका स्थळासह महत्वाचे शक्तिपीठ असूनही पोलीस बळ कमी असल्याने प्रत्येक ठिकाणी लक्ष देणे शक्य होत नाही. याचा फायदा घेऊन गुप्तधन शोधणाऱ्या टोळ्या किल्ल्यात धुडगूस घालतात तर अघोरी प्रकार करणारे तथाकथित बाबा येऊन येथे अघोरी विद्या सफल करण्याचा प्रयत्न करतात,असाच प्रकार दि.०६ नोव्हेंबर रोजी ऐण भरदिवसा दुपारी ०१:३० वाजताच्या सुमारास दत्तशिखर रोडवर गरुडगंगा जवळील पुलाजवळ घडल्याने भाविकांसह नागरिकांमध्ये घबराटीचे वातावरण पसरल्याने पोलिसांनी या गंभीर प्रकाराची चौकशी करावी,अशी मागणी होत आहे.
दि.०६ नोव्हेंबर रोजी दूपारच्या वेळी काही नागरिक दत्तशिखर मंदिराजवळील रस्त्यावरील पुलाजवळून जात असताना त्यांनी एका महिलेसह दोन पुरुष अधोरी विधी करताना पाहिल्याचे सांगितले. महीला खाली बसून पुजा करत होती तर बाजूला कोयता होता. तसेच त्याठिकाणी रक्ताचे डाग आणि काही पूजाविधीची सामग्री आढळली. महिलेच्या कपाळावर रक्ताचा ‘तिलक’ लावलेला असल्याचे येणाऱ्या जाणाऱ्या भाविकांनी सांगितले.
विधी संपल्यानंतर स्थानिक नागरिकांनी त्या ठिकाणी जाऊन पाहिले असता, सदरील ठिकाणी एक बोकड मृत अवस्थेत आढळले. त्यामुळे नागरिकांमध्ये याठिकाणी अघोरी विद्येचा प्रयोग केला गेला काय? असा प्रश्न निर्माण झाला आहे. या प्रकारानंतर परिसरात भीतीचे वातावरण निर्माण झाले असून, नागरिकांनी पोलिस प्रशासनाकडे तात्काळ तपासाची मागणी केली आहे.
हा अंधश्रद्धेचा प्रकार कि, अघोरी काळी जादूचा प्रकार या विषयी उलटसुलट चर्चा सुरू आहे.
भाविक भक्त मोठ्या संख्येने श्रीक्षेत्र माहूर येथे दर्शनासाठी येतात. त्यामुळे अशा घटनांमुळे धार्मिक वातावरणावर विपरित परिणाम होण्याची शक्यता व्यक्त केली जात असून पोलिसांनी गडासह जंगलात फेरफटका मारण्यासाठी विशेष पथकाची तात्काळ नेमणूक करावी, अन्यथा या आधी घडलेल्या घटनांची पुनरावृत्ती होण्याची शक्यता नाकारता येत नसल्याच्या चिंतायुक्त प्रतिक्रिया नागरिकांमधून व्यक्त होत आहेत.
