पंढरपूर – येथील गोपाळपूर रस्त्यावरील अत्यंत प्राचिन अशा विष्णूपद मंदिरावर या वर्षी देखील विठ्ठल रुक्मिणी मंदिर समितीच्या वतीने आकर्षक अशी विद्युत रोषणाई करण्यात आली आहे. मार्गशिर्ष महिन्यात संपुर्ण महिनाभर या मंदिरात विठ्ठलाचे वास्तव्य असल्याची अख्यायिका सांगितली जाते. मार्गशिर्ष महिना शुक्रवारी (ता.२१) पासून सुरु झाला आहे. त्यामुळे महिनाभर या मंदिरात भाविकांची आता दर्शनासाठी वर्दळ राहणार आहे.
येथील चंद्रभागेच्या पात्रात असलेले विष्णूपद मंदिर हे एक प्राचिन मंदिर आहे. विठ्ठलाच्या दर्शनासाठी येथे येणारा प्रत्येक भाविक विष्णूपद मंदिराला भेट देत असतो. मार्गशिर्ष शुध्द प्रतिपदा ते मार्गशिर्ष वद्य अमावस्या या काळात संपुर्ण महिनाभर विठुरायाचे वास्तव्य याच मंदिरात असल्याची अख्यायिका आहे. त्यामुळे या ठिकाणी महिनाभर दररोज पहाटे व संध्याकाळी विठुरायाची आरती होत असते. या शिवाय विविध धार्मिक कार्यक्रमांचे आयोजन देखील येथे करण्यात येत असते. त्यामुळे पंढरपूर शहर तसेच आसपासच्या गावातील तसेच खास परगावाहून येणाऱ्या भाविकांची देखील या मंदिरात मोठी गर्दी असते. याच काळात नाताळ सुट्या असल्याने बाहेरगावच्या शाळांमधील विद्यार्थ्याच्या सहली देखील येथे येत असतात.
गेल्या चार ते पाच वर्षापासून या प्राचिन मंदिरावर विठ्ठल रुक्मिणी मंदिर समितीच्या वतीने आकर्षक अशी विद्युत रोषणाई केली जात आहे. या बरोबरच हे मंदिर नदीपात्रात असल्याने संपुर्ण मंदिराला बँरेकेटींग करण्यात आले आहे. पंढरपूर नगरपालिकेच्या वतीने या मंदिर परिसरात स्वच्छता तसेच दिवाबत्तीची सोय करण्यात आली आहे.
————————————
अशी आहे विष्णूपद मंदिराची अख्यायिका –
चंद्रभागा पात्रातील विष्णूपद मंदिरात गायीच्या पावलांचे ठस्से, कृष्णाने राधा तसेच गायींसाठी वाजविलेली बासरी तसेच या ठिकाणी कृष्णाने आपल्या संवगड्यासह काला करुन खाल्लेली काल्याच्या वाटीच्या खुणा दगडा मध्ये कोरलेल्या दिसून येतात. या बरोबरच या ठिकाणी भगवान विष्णूची पावले देखील उमटलेली दिसतात. त्यामुळे या ठिकाणाला विष्णूपद असे नाव पडल्याचे सांगितले जाते.
———————————-
फोटोओळी : पंढरपूर : येथील अतिप्राचिन अशा विष्णूपद मंदिरात दगडावर कोरलेल्या गायीच्या पावलांचे ठस्से, कृष्णाने राधा तसेच गायींसाठी वाजविलेली बासरी आणि या ठिकाणी कृष्णाने आपल्या संवगड्यासह काला करुन खाल्लेली काल्याच्या वाटीच्या खुणा
