सांगोला – सांगोला तालुक्याला कधी नव्हे तो भरपूर विकास निधी दिला आहे. शहराच्या विकासासाठी २०० कोटी निधी दिला. त्यातून अनेक कामे मार्गी लागली. रस्त्यासाठी ८० कोटीची मागणी केली आहे. आचारसंहिता संपताच रस्त्यासाठी ८० कोटी देणार असे प्रतिपादन उपमुख्यमंत्री एकनाथ शिंदे यांनी सांगोल्यात केले. ते सांगोला नगरपालिका
निवडणुकीसाठी शिवसेना पक्षाकडून लढवीत असलेल्या नगराध्यक्ष व नगरसेवक पदाच्या उमेदवाराच्या प्रचारार्थ रविवार दि.२३ नोव्हेंबर रोजी छत्रपती शिवाजी महाराज चौक येथे आयोजित जाहीर सभेत बोलत होते.
पुढे बोलताना एकनाथ शिंदे म्हणाले, एका शेतकरी कुटुंबातील मुलाने राज्याचा मुख्यमंत्री होऊन गोरगरिबांना खऱ्या अर्थाने न्याय दिला. मुख्यमंत्री माझी लाडकी बहीण योजना उपमुख्यमंत्री एकनाथ शिंदे असेपर्यंत चालू राहणार आहे. एसटीमध्ये प्रवाशांना ५०% सवलत, मुलींना उच्च शिक्षण मोफत, मुख्यमंत्री सहाय्यता निधीतून अनेक रुग्णांचे प्राण वाचवण्यासाठी दिलेले योगदान खूप मोठे आहे. तरी दि.२ डिसेंबरला होणाऱ्या मतदाना दिवशी सर्वांनी धनुष्यबाणावरती मतदान करून नगरपालिकेच्या निवडणुकीत शिवसेनेकडून उभे असलेल्या सर्व उमेदवारांना विजयी करा असे आवाहन त्यांनी शेवटी केले.
यावेळी माजी आ.शहाजीबापू पाटील, माळशिरसचे आ.उत्तमराव जानकर, माजी नगराध्यक्ष रफिक नदाफ, माजी नगराध्यक्षा राणी माने, शितल लादे, प्रा.संजय देशमुख, नगराध्यक्ष पदाचे उमेदवार आनंदा माने, नितीन इंगवले, शिवसेना तालुकाप्रमुख दादासाहेब लवटे यांनी मनोगत व्यक्त केले. याप्रसंगी शिवसेनेचे साईनाथ अभंगराव, विजय शिंदे, दिग्विजय पाटील, सागर पाटील यांच्यासह शहरातील मतदार मोठ्या संख्येने उपस्थित होता. कार्यक्रमाचे प्रास्ताविक आनंद घोंगडे यांनी केले.
