करमाळा – शिवसेना श्रमिक राष्ट्रीय कामगार सेनेचे प्रदेश कार्याध्यक्ष बाबासाहेब चव्हाण यांनी बीव्हीजी इंडिया प्रा. लि. या कंपनीकडून त्यांना थेट जीवघेणी धमकी मिळाल्याचा गंभीर आरोप केला असून या प्रकरणामुळे कामगार वर्तुळात खळबळ उडाली आहे. मुंबईतील रेल्वे वाडीबंदर डेपो येथे कार्यरत असलेल्या सुमारे 750 कामगारांचे नॅशनल हॉलिडे, पेड लिव्ह, ग्रॅज्युइटी तसेच काहींच्या पगाराचे थकित देयक कंपनीकडून रोखून धरल्याची तक्रार कामगारांनी चव्हाण यांच्याकडे केली होती.
या तक्रारीनंतर चव्हाण यांनी बीव्हीजी इंडिया प्रा. लि. यांच्याशी तीन वेळा लेखी पत्रव्यवहार केला. मात्र कंपनीकडून कोणताही प्रतिसाद मिळाला नाही. अखेर देयकाचा विषय न सुटल्याने चव्हाण यांनी रितसर परवानगी घेऊन कंपनीच्या गेटवर कामगारांसह आंदोलन आयोजित केले. या आंदोलनादरम्यान कंपनीचे मालक दत्ता गायकवाड,हनुमंत गायकवाड व रवी देशपांडे यांनी उपस्थित राहून “काही रक्कम तत्काळ देऊ,उर्वरित रक्कम दिवाळीनंतर नक्की अदा करू,”असे लेखी आश्वासन दिले. त्यानुसार कामगारांच्या खात्यात काही रक्कम जमा झाली आणि त्यांना वेळेवर संदेशही प्राप्त झाले. परिणामी आंदोलन स्थगित करण्यात आले.
तथापि, दिवाळीनंतर उर्वरित देयकाच्या पाठपुराव्यात कंपनीकडून पुन्हा टाळाटाळ सुरू झाली, असा आरोप चव्हाण यांनी केला आहे. चव्हाण यांनी या संदर्भात वारंवार दत्ता गायकवाड व हनुमंत गायकवाड आणि रवी देशपांडे,गणेश जाधव यांच्याशी संपर्क साधला, परंतु चौघांनीही समाधानकारक उत्तर न दिल्याचे त्यांनी सांगितले.
१७ नोव्हेंबर २०२५ रोजी, चव्हाण वाडीबंदर डेपो येथे कामगारांना भेटण्यासाठी गेले असता, त्यांनी पुन्हा एकदा गायकवाड यांना देयकांची आठवण करून दिली. यानंतर लगेचच विक्की गायकवाड नावाच्या व्यक्तीचा चव्हाण यांना फोन आला. विक्की गायकवाड हा कथितपणे अंडरवर्ल्ड डॉन छोटा राजनचा भाचा असल्याची माहिती स्वयं चव्हाण यांनी दिली. “बीव्हीजी कंपनीकडून आम्हाला हप्ते मिळतात. कंपनीला आणि आम्हाला त्रास दिलात तर तुम्हाला ठार मारू,” अशा शब्दांत धमकी दिल्याचा गंभीर आरोप चव्हाण यांनी केला आहे.
या प्रकरणाची चौकशी करावी, संबंधितांवर कारवाई करावी, अशी मागणी चव्हाण यांनी केली असून कामगार संघटनांमध्ये संताप व्यक्त केला जात आहे.
