वसमत / हिंगोली – नगरपरिषद निवडणुकीच्या तोंडावर वसमत शहरातील एका महत्त्वाच्या प्रभागात मतदारांमध्ये मोठी नाराजीची लाट उसळलेली दिसत आहे. सलग चार ते पाच कार्यकाळांपासून सत्ता उपभोगलेल्या माजी नगरसेवकाच्या कार्यपद्धती, विकासातील विलंब, जनसंपर्काचा अभाव आणि “निवडणुकीच्या काळातच दर्शन” या मुद्यांवर नागरिकांनी थेट नाराजी व्यक्त केली आहे.
स्थानिक पातळीवर घरोगरी झालेल्या चर्चांमध्ये मतदारांचे एकच धोरण स्पष्ट दिसत आहे :
“जुन्यांना धडा शिकवण्याची वेळ आली आहे”
“काम नाही तर मतदान नाही”
“यावेळी नव्या चेहऱ्याला संधी देऊ”
असे मतदारांचे सूर निघत आहे.
विशेष म्हणजे त्या प्रभागात यंदा तरुण आणि तडफदार नवीन उमेदवार निवडणूक रिंगणात उतरला असून, त्याने निवडणुकीपूर्वीच नागरिकांच्या समस्या ऐकून तत्काळ तोडगा काढण्यास सुरुवात केली आहे. त्यामुळे नवीन उमेदवाराच्या बाजूने जनमत वेगाने झुकत असल्याचे संकेत मिळत आहेत.
स्थानिक नागरिकांच्या मतानुसार —
“पाच वर्षांनी येणारे नाही, रोज उपलब्ध राहणारे लोक आम्हाला पाहिजेत.”
“प्रभागासाठी काम करणारा माणूस निवडणार, पक्ष नाही तर विकास बघू.”
त्यामुळे या प्रभागातील मतदानाची दिशा संपूर्ण वसमतच्या राजकीय समीकरणात उलथापालथ घडवू शकते, अशी चर्चा राजकीय पटलावर रंगू लागली आहे.
आता लक्ष लागले आहे —
मतदार नाराजीचे मतदानात रूपांतर करतील का?
नवीन चेहऱ्याला विश्वासाची संधी मिळणार का?
की शेवटच्या क्षणी समीकरणे बदलतील?
२ तारखेचे मतदानच ठरवणार, माजी नगरसेवकाला पुन्हा संधी मिळणार की बदलाची घंटा वाजणार!
