पंढरपूर – येथील जय महाराष्ट्र युवा मंच आणि रुक्मिणी प्रतिष्ठान यांच्या संयुक्त विद्यमाने आयोजित करण्यात आलेल्या भव्य किल्ला स्पर्धेचा पारितोषिक वितरण समारंभ नुकताच पार पडला. जय महाराष्ट्र युवा मंच तर्फे आयोजित किल्ला स्पर्धेचे हे ११ वे वर्ष आहे. कार्यक्रमाच्या अध्यक्षस्थानी जय महाराष्ट्र युवा मंचचे संस्थापक श्रीराम साळुंखे तर प्रमुख पाहुणे म्हणून रुक्मिणी प्रतिष्ठानचे संस्थापक सुनंजय पवार उपस्थित होते.
या प्रसंगी आपल्या भाषणात सुनंजय पवार यांनी मंचाच्या कार्याचे कौतुक केले तसेच दुर्गप्रेमींना प्रेरणा देवून दुर्ग संवर्धनाचे महत्व आपल्या ओघवत्या शैलीत विषद केले. याप्रसंगी व्यक्त होताना त्यांनी सर्व विजेते आणि सहभागी स्पर्धक यांचे अभिनंदन करून भावी काळात यशस्वी होण्यासाठी शुभेच्छा दिल्या.
प्रास्ताविकात ऍड.सोहम व्होरा यांनी विविध दुर्ग प्रकारांची माहिती, पर्यावरणीय दृष्टीने गडकोटाचे संरक्षण तसेच दुर्ग संवर्धनाच्या कार्याची गरज या विषयावर संवाद साधून गडप्रेमींना बहुमोल मार्गदर्शन केले. यानंतर सर्व विजेते तसेच सर्व सहभागी यांचा प्रशस्तीपत्र आणि पारितोषिक देऊन गौरव करण्यात आला.
दरम्यान ही किल्ला स्पर्धा शालेय गट , महिलांसाठी हिरकणी गट, खुला गट आणि सांघिक गट आणि ग्रामीण गट अशा पाच गटात आयोजित केली होती. किल्ले बांधणी, पर्यावरणपूरक सजावट आणि गडकिल्ले विषयाचे ज्ञान यांच्या आधारे या किल्ल्याचे परीक्षण करण्यात आले. परीक्षक म्हणून सोहम व्होरा, श्रीराम साळुंखे यांनी जबाबदारी पार पाडली.
स्पर्धेचे यशस्वी आयोजन करण्यासाठी रुक्मिणी प्रतिष्ठानचे श्रीकृष्ण साळुंखे, ऋषिकेश आगावणे, दशरथ पवार, स्वप्नील गांडूळे, धीरज गोसावी तसेच जय महाराष्ट्र युवा मंचाचे श्रीराम साळुंखे, विकास बडवे, मुकुंद बडवे, माधव बडवे, आदित्य बिडकर आणि इतर सर्व सहकारी यांनी परिश्रम घेतले.
—————–
किल्ला स्पर्धा २०२५ चे पारितोषिक विजेते –
खुला गट :- वरद बडवे (प्रथम), दुर्वांकुर बेणारे (व्दितीय),जगदंबा मित्र मंडळ (तृतीय).हिरकणी गट :- श्वेता घाडगे (प्रथम), ऐश्वर्या कुलकर्णी (व्दितीय), कार्तिकी कुलकर्णी (तृतीय).शालेय गट:- उमदे गल्ली मित्र मंडळ (प्रथम),खंदारे परिवार (व्दितीय) आणि द्वारकाधीश सातारकर (तृतीय).सांघिक गट:- संकल्प प्रतिष्ठान (प्रथम),शिवप्रेमी १० ग्रुप (व्दितीय), देगलूरकर महाराज मठ मित्र मंडळ (तृतीय). ग्रामीण गट :- तावशी (प्रथम) आणि गोपाळपूर (व्दितीय).
