तळणी / जालना : लोणार–तळणी–मंठा या दिंडी महामार्गावर शनिवारी रात्री ८ ते ९ च्या दरम्यान दोन स्वतंत्र अपघातांत तिघांचा मृत्यू झाल्याने परिसरात हळहळ व्यक्त केली जात आहे. एक अपघात पाठीमागून झालेल्या जोरदार धडकेचा तर दुसरा समोरासमोरच्या धडकेचा आहे.
तळणीवरून मंठ्याकडे जाणाऱ्या स्विफ्ट डिझायर (क्र. MH-21 EX 1622) ने तळणी–लिंबखेडा मार्गावरून जाणाऱ्या दुचाकीला (क्र. MH-14 EE 2986) पाठीमागून जोरदार धडक दिली. यात दुचाकीवरील गजानन लोकडीबा कांगणे (४६) व त्यांची पत्नी रुखमीला गजानन कांगणे (४०), रा. वाघाळा ता. मंठा यांचा जागीच मृत्यू झाला. हे दांपत्य शिरपूर व वडगाव येथील नातेवाईकांना भेटण्यासाठी गेले होते परतत असताना हा अपघात झाला. काही दिवसांनी त्याच्या मुलाचे लग्न होते त्या संदर्भात नातेवाईकांना भेटण्यासाठी म्हणून हे दाम्पत्य गेले होते .
दुसऱ्या घटनेत लोणारहून तळणीकडे येणाऱ्या दुचाकीला (क्र. MH-21 BC 3897) अज्ञात वाहनाने समोरासमोर धडक दिली. यात रविराज जिवन खेरमोडे (२६), रा. तळणी यांचा मृत्यू झाला. धडक इतकी भीषण होती की उपचारापूर्वीच त्यांचा मृत्यू झाल्याची माहिती आहे.
निष्पापांचा बळी..?
एका पाठीमागून तर दुसऱ्या समोरासमोरच्या धडकेत तिघेही निष्पाप नागरिक मृत्यूमुखी पडले आहेत. एका कुटुंबातील दांपत्य आणि दुसऱ्या कुटुंबातील तरुणाचा अकस्मात झालेला मृत्यू ही मोठी हानी आहे. महामार्गावरील वाहतूक नियमांचे उल्लंघन आणि बेफाम वेग या दोन्हींचा बळी तीन निरपराधांनी गेल्याची खंत नागरिक व्यक्त करत आहेत.
अपघात झाला तेव्हा अनेकांनी पोलीसांना फोन करून अपघाताची माहिती दिली पंरतू पोलीस दोनही ठिकाणी वेळवर न आल्याने वाघाळा वडगाव येथील नातेवाईकांनी पोलीस प्रशासनासमोर रोष व्यक्त केला अपघात ग्रस्तांना रुग्णालयात दाखल करण्यात आल्यानंतर पोलीस आले .
