अंबड नगरपरिषद निवडणूक: ‘स्ट्रॉंग रूम’ला त्रिस्तरीय अभेद्य सुरक्षा कवच

अंबड / जालना – अंबड नगरपरिषद सार्वत्रिक निवडणूक २०२५ साठी दिनांक २ डिसेंबर २०२५ रोजी मतदान प्रक्रिया अत्यंत भयमुक्त, शांततापूर्ण आणि पारदर्शक वातावरणात पार पडली. मतदानानंतर सर्व इलेक्ट्रॉनिक वोटिंग मशीन्स (EVM) येथील ‘स्ट्रॉंग रूम’मध्ये अत्यंत सुरक्षित रित्या ठेवण्यात आल्या असून, या ठिकाणाला अभेद्य सुरक्षा पुरविण्यात आली असल्याची माहिती निवडणूक निर्णय अधिकारी तथा तहसीलदार विजय चव्हाण यांनी दिली आहे.

उमेदवारांच्या समक्ष सीलिंग प्रक्रिया पूर्ण
मतदान प्रक्रिया पार पडल्यानंतर, निवडणूक निरीक्षक श्री. संतोष घोडके, उपविभागीय पोलीस अधिकारी (SDPO) श्री. सिद्धेश्वर धुमाळ, सहायक निवडणूक निर्णय अधिकारी तथा मुख्याधिकारी श्री. मनोज किर्दे यांच्या उपस्थितीत स्ट्रॉंग रूम सील करण्यात आली. तत्पूर्वी, उपस्थित उमेदवार आणि त्यांच्या प्रतिनिधींना स्ट्रॉंग रूमची पाहणी करू देण्यात आली आणि त्यांच्या पूर्ण समाधानानंतरच त्यांच्या समक्ष स्ट्रॉंग रूमला सील लावून ती बंदोबस्तासाठी उपस्थित पोलीस अधिकाऱ्यांच्या ताब्यात देण्यात आली.

अशी आहे त्रिस्तरीय (Three-Layer) सुरक्षा व्यवस्था:
स्ट्रॉंग रूमच्या सुरक्षेसाठी निवडणूक आयोगाच्या मार्गदर्शक सूचनांनुसार कडेकोट बंदोबस्त तैनात करण्यात आला आहे:
१. अंतर्गत सुरक्षा (Inner Circle): स्ट्रॉंग रूमच्या अगदी जवळ, मधल्या बाजूस आणि समोरील बाजूस एस.आर.पी.एफ. (SRPF) चे एक सेक्शन (सशस्त्र जवान) तैनात असून ते २४ तास पहारा देत आहेत.
२. मध्य सुरक्षा: जिल्हा पोलिसांचे ‘१+८’ चे गार्ड (Guard) या ठिकाणी सज्ज आहे.
३. बाह्य सुरक्षा (Outer Circle): बाह्य बाजूने स्थानिक पोलिसांचे ६ ते ८ अधिकारी व कर्मचारी यांची करडी नजर असून कोणालाही विनापरवाना प्रवेश निषिद्ध आहे.

अत्याधुनिक सीसीटीव्ही आणि फायर सेफ्टी
सुरक्षेच्या कारणास्तव आणि शॉर्ट सर्किटची शक्यता टाळण्यासाठी स्ट्रॉंग रूममधील अंतर्गत इलेक्ट्रिक सप्लाय पूर्णपणे खंडित (Cut) करण्यात आला आहे. मात्र, बाह्य भागावर नजर ठेवण्यासाठी अत्याधुनिक सीसीटीव्ही कॅमेरे बसवण्यात आले असून त्याद्वारे २४ तास देखरेख सुरू आहे. तसेच, आगीच्या दुर्घटना टाळण्यासाठी घटनास्थळी फायर एक्सटिंग्विशर (Fire Extinguisher) आणि नगर परिषदेचे फायर ब्रिगेडचे वाहन (अग्नि बंब) २४ तास तैनात ठेवण्यात आले आहे.

वरिष्ठ अधिकाऱ्यांचे सतत नियंत्रण
सुरक्षा व्यवस्थेवर पोलीस निरीक्षक आणि डीवायएसपी (DySP) यांच्याकडून वेळोवेळी गस्त (Patrolling) घातली जात आहे. तसेच निवडणूक विभागाचे कर्मचारी आणि स्वतः निवडणूक निर्णय अधिकारी म्हणून मी (विजय चव्हाण) व सहायक निवडणूक निर्णय अधिकारी नियमित भेटी देऊन सुरक्षेचा आढावा घेत आहोत.
पारदर्शकता आणि विश्वासार्हता जिल्हाधिकारी आणि निवडणूक आयोगाच्या सर्व सूचनांचे या ठिकाणी तंतोतंत पालन करण्यात येत आहे. स्ट्रॉंग रूमच्या सुरक्षेत कोणताही निष्काळजीपणा होणार नाही, याची १००% खबरदारी घेण्यात आली आहे. पारदर्शकतेचा भाग म्हणून, जर कोणत्याही उमेदवाराला किंवा त्यांच्या प्रतिनिधीला स्ट्रॉंग रूमच्या बाह्य आवारात थांबून पाहायचे असेल, तर त्यांचीही तिथे थांबण्याची स्वतंत्र व्यवस्था प्रशासनाने केली आहे.

तरी सर्व नागरिक व उमेदवारांनी प्रशासनावर विश्वास ठेवावा, ईव्हीएम पूर्णतः सुरक्षित आहेत, असे आवाहन निवडणूक निर्णय अधिकारी विजय चव्हाण यांनी केले आहे.

जारी कर्ता:
विजय चव्हाण
तहसीलदार तथा निवडणूक निर्णय अधिकारी,
अंबड नगरपरिषद सार्वत्रिक निवडणूक २०२५