छत्रपती संभाजीनगर – लासूर स्टेशन (ता. गंगापूर) येथील जिजामाता सार्वजनिक वाचनालयास छत्रपती संभाजीनगर जिल्ह्यातील ग्रामीण भागातील “उत्कृष्ट सार्वजनिक ग्रंथालय” म्हणून पुरस्कार प्रदान करण्यात आला.
सन 1982 मध्ये स्थापन झालेल्या या वाचनालयाने गेल्या चार दशकांहून अधिक काळ ज्ञानप्रसार, वाचनसंस्कृतीची जोपासना व सामाजिक प्रबोधनाचे कार्य सातत्याने केले आहे. वाचनालयात सुमारे १५,००० विविध विषयांवरील ग्रंथसंपदा, मासिके व वर्तमानपत्रे उपलब्ध असून विद्यार्थ्यांसाठी ५० ते ६० आसनांची सुसज्ज व शांत अभ्यासिका कार्यरत आहे.
या अभ्यासिकेचा लाभ घेऊन अनेक विद्यार्थी-विद्यार्थिनी महसूल, पोलीस, शिक्षण, आरोग्य, पंचायत राज आदी विविध शासकीय सेवांमध्ये कार्यरत झाले आहेत. ग्रामीण भागातील विद्यार्थ्यांना अभ्यासासाठी योग्य वातावरण उपलब्ध करून देण्यात या वाचनालयाचा मोठा वाटा आहे.
या उल्लेखनीय कार्याची दखल घेऊन जिल्हास्तरीय समितीच्या वतीने जिजामाता सार्वजनिक वाचनालयास हा सन्मान प्रदान करण्यात आला. या यशामागे वाचनालयाचे अध्यक्ष, उपाध्यक्ष, कोषाध्यक्षसह सचिव तुषार सराफ तसेच ग्रंथपाल सौ. संध्या सराफ यांच्या अथक परिश्रमांचे मोलाचे योगदान आहे.
या पुरस्कारामुळे लासूर स्टेशन परिसरात आनंदाचे वातावरण निर्माण झाले असून वाचनालयाच्या सर्व पदाधिकारी, कार्यकर्ते व वाचकांकडून अभिनंदनाचा वर्षाव होत आहे.
