माढा – दिनांक २४ जानेवारी: हिंदूहृदयसम्राट बाळासाहेब ठाकरे यांनी सामाजिक, सांस्कृतिक व लोककल्याणाच्या क्षेत्रात दिलेले व्यापक योगदान विचारात घेऊन त्यांच्या जन्मशताब्दी वर्षानिमित्त राज्यातील नागरी स्थानिक संस्थांमध्ये हिंदूहृदयसम्राट बाळासाहेब ठाकरे नागरी लोककल्याण अभियान राबविण्याकरिता नगरपंचायत परिक्षेत्रात अधिसूचित नागरी सेवा व सुविधा पुरविणे (ले.शि. ३६०४ १०१८) योजनेंतर्गत माढा नगरपंचायतीस १ कोटी निधी मंजूर करण्यात आलेला आहे.
या मंजूर निधीतून नागरी स्थानिक संस्था क्षेत्रातील शाळांची विशेषतः मराठी शाळांची गुणवत्ता वृध्दी, आरोग्याच्या विशेषतः महिला आरोग्यासाठी उत्तम सुविधा उपलब्ध करणे, पर्यावरण व नागरी स्वच्छता, पर्यटन विकास तसेच नागरी स्थानिक संस्थांना आत्मनिर्भर होण्यासाठी प्रोत्साहन देऊन संस्थांमध्ये सर्वांगीण नागरी विकास साधण्यासाठी नागरी लोककल्याण अभियान राबविण्याचा शासनाचा मानस आहे.
या मंजूर निधीतून उत्कृष्ट कामगिरी करणाऱ्या नगरपंचायतींची निवड करण्यात येईल व प्रथम क्रमांक मिळविणाऱ्या नगरपरिषद / नगरपंचायतीस रु.५ कोटी निधीची कामे “वैशिष्टयपूर्ण” योजनेतून मंजूर करण्यात येतील तसेच द्वितीय व तृतीय क्रमांक मिळविणाऱ्या नगरपरिषद / नगरपंचायतीस अनुक्रमे ३ कोटी व २ कोटी निधीची कामे मंजूर करण्यात येतील असे नमूद आहे.
तरी लवकरात लवकर या योजातून माढा नगरपंचायत मार्फत कामांचा शुभारंभ करु व माढा नगरपंचायतीचा या स्पर्धेमध्ये प्रथम क्रमांक मिळवुन शहराच्या विकासासाठी निधी उपलब्ध करण्याचा प्रयत्न करू असे माढा नगरपंचायतीच्या नगराध्यक्षा अॅड मिनल साठे व मुख्याधिकारी नेहा कंठे यांनी सांगितले.
तसेच हा निधी दिल्याबद्दल नगराध्यक्षा अॅड मीनल साठे व मा. उपनगराध्यक्षा कल्पना जगदाळे, सभापती रेश्मा लंकेश्वर, सभापती मोहिनी नेटके, सभापती शबाना बागवान, नगरसेविका सुनिता राऊत, निर्मला थोरात, वंदना लंकेश्वर नगरसेवक अजिनाथ माळी,अरुण कदम, नितीन साठे,विकास साठे यांनी महाराष्ट्राच शासनाचे आभार मानले व यापुढे नागरी विकास करण्यासाठी असे निधी मंजूर करावे असे आवाहन केले.
