माहूर – तालुक्यातील मौजे आष्टा येथून दोघे सख्खे भाऊ दुचाकीवर माहूर येथे सोमवारी भरणाऱ्या आठवडी बाजारासाठी येत असतांना शहरालगतच्या मालवाडा घाटातील कठीण वळणावर उपविभागीय पोलीस अधिकारी कार्यालयासमोर केटीसी लिहिलेल्या मोठ्या ट्रकने दुचाकीला धडक देऊन दोघांनाही गंभीर जखमी करत पसार झाल्याची अपघाताची खळबळजनक घटना दि.2 फेब्रुवारी रोजी दुपारी १२ वाजताच्या सुमारास घडली. या अपघातात दोघांचेही उजवे पाय फ्रॅक्चर झाले असून, जखमींना पुढील उपचारासाठी यवतमाळ येथे हलविण्यात आले आहे.
मौजे आष्टा येथून सोमवार हा माहूरच्या आठवडी बाजारचा दिवस असल्याने शाईन मोटरसायकल क्रमांक MH 20 B J 9809 वरुन गणेश भाऊसिंग राठोड वय 50 अणि रमेश भाऊसिंग राठोड वय 45 दोघेही राहणार कसळसिंग तांडा हे माहूरकडे येत होते. मालवाडा घाटातील अतिशय कठीण वळण असलेल्या उपविभागीय पोलीस अधिकारी कार्यालया समोरील घातक वळणावरून दोघे येत असताना समोरून माहूरच्या दिशेने आदिलाबाद कडे जाणारा एक केटीसी ट्रक भरधाव वेगात आल्याने मोटरसायकलला त्याचा धक्का बसल्याने दोघेजण अर्धवट असलेल्या रस्त्यावरील गीट्टीवर आदळले.त्यामुळे दोघांचेही उजवे पाय पोटरी जवळ मोडले व छातीला, डोक्याला गंभीर मार लागला. उपस्थितांनी त्यांना जवळच असलेल्या ग्रामीण रुग्णालयात दाखल केले.यावेळी केटीसी कंपनीच्या ट्रकच्या स्पीडला ब्रेक लावावा अशी मागणी उपस्थित नागरिकांनी पोलिसांना केली. रुग्णालयात वैद्यकीय अधीक्षक डॉ. ओमप्रकाश साबळे यांनी प्रथमोपचार करून 108 ॲम्बुलन्सचे चालक आसिफ बेग यांचे देखरेखीखाली यवतमाळ येथे पुढील उपचारासाठी पाठवले.
मालवाडा घाटात अर्ध्या रस्त्याचे काम पूर्ण झाले असून, वन विभागाच्या अडचणीमुळे अर्ध्या रस्त्याचे काम एका बाजूने झाले परंतु दुसरी बाजू अर्धवट ठेवल्याने या ठिकाणी रहदारीस प्रचंड अडथळे येत अनेकवेळा अपघात घडत आहेत. त्यामुळे सदरील रस्त्याचे काम तात्काळ निकाली काढण्याची मागणी वाहनधारकातून होत आहे.
माहूर ग्रामीण रुग्णालयात जर ट्रॉमा केअर सेंटर असते तर येथेच त्यांचा उपचार झाला असता, अशा खंतयुक्त प्रतिक्रिया यावेळी उपस्थितातून ऐकू येत होत्या.
