सोलापूर : बिल्डर असोसिएशन ऑफ इंडिया सोलापूर सेंटरतर्फे नवनिर्वाचित महापौर विनायक कोंड्याल, उपमहापौर ज्ञानेश्वरी देवकर तसेच सभागृह नेते नरेंद्र काळे यांचा सत्कार करण्यात आला.
बिल्डर असोसिएशन ऑफ इंडिया सोलापूर सेंटरचे अध्यक्ष संतोष कलकुटगी आणि यशवंत पाथरूट यांच्या हस्ते फेटा बांधून, शाल परिधान करून, पुष्पगुच्छ देऊन नूतन महापौर विनायक कोंड्याल, उपमहापौर ज्ञानेश्वरी देवकर तसेच सभागृह नेते नरेंद्र काळे यांचा सन्मान करण्यात आला. याप्रसंगी असोसिएशनचे अध्यक्ष संतोष कलकुटगी म्हणाले, नूतन महापौर विनायक कोंड्याल हे चौथ्यांदा निवडून आले आहेत. विकसनशील असलेले सोलापूर विकसित सोलापूर होण्याच्या दिशेने पाऊल टाकत आहे. अशा काळात विनायक कोंड्याल यांच्यासारखे विकासाची दृष्टी असणारे नगरसेवक महापौर झाल्यामुळे शहराच्या सर्वांगीण प्रगतीचा वेग निश्चित वाढणार आहे. कोणत्याही शहराच्या विकासात बांधकाम उद्योजकांचेदेखील योगदान आवश्यक असते. त्यामुळे बिल्डर असोसिएशन ऑफ इंडिया सोलापूर सेंटरदेखील सोलापूर शहराच्या विकासात आपला वाटा उचलेल अशी ग्वाही असोसिएशनचे अध्यक्ष संतोष कलकुटगी यांनी दिली. उपमहापौर ज्ञानेश्वरी देवकर या उच्चशिक्षित आहेत. शहराच्या विकासाबाबत त्यांना तळमळ आहे. त्यामुळे त्यांच्या उपमहापौरपदाच्या कार्यकाळात त्यांच्याकडूनही अनेक सकारात्मक कामे निश्चितपणे होतील. सभागृह नेते नरेंद्र काळे हेदेखील अभियंता असून त्यांना यापूर्वीचा सभागृहातील कामकाजाचा, शहर विकासाचा मोठा अनुभव आहे. त्यामुळे त्यांच्या अनुभवाचाही फायदा शहराला होणार आहे, असेही असोसिएशनचे अध्यक्ष संतोष कलकुटगी याप्रसंगी म्हणाले.
यावेळी बिल्डर असोसिएशन ऑफ इंडिया सोलापूर सेंटरचे संतोष कलगुटगी, अशोक गांधी, राजेश देशमुख, अमर बिराजदार, मनोज म्हेत्रस, युवराज चुंबळकर, सलीम शेख, रामभाऊ दुधाळ, यशवंत पाथरूट, व्यंकटेश कोटा, सुजित पाटोळे, हनुमंत कुलकर्णी आदी उपस्थित होते.
