पंढरपूर – गेल्या सहा महिन्यापूर्वी शहरातील कुंभार गल्ली येथे दुहेरी खून प्रकरण घडले होते. हे खून प्रकरण उलगड्यासाठी मागील सहा महिन्यापासून पोलिस या प्रकरणातील आरोपींचा शोध घेत होते. अखेर या प्रकरणाचा तपास लावण्यात पोलिसांना यश आले आहे. या दुहेरी खून प्रकरणाचा तपास लावून पोलिसांनी तीन संशयीतांना अटक केली आहे. विशेष म्हणजे अटक केलेल्या तिघांमध्ये एका अल्पवयीन (विधीसंघर्षग्रस्त ) बालकाचा देखील समावेश असल्याची धक्कादायक माहिती सुत्रांकडून प्राप्त झालेली आहे. दरम्यान हे तिघेही संशयीत खून झालेल्या कुंभार गल्ली परिसरातील असून दुहेरी हत्याकांड हे प्रेम प्रकरणातून झाले असल्याची दबक्या स्वरात चर्चा आहे.
पंढरपूर शहरातील कुंभार गल्ली येथे राहणारे लखन जगताप (वय २६ वर्षे) व त्याची आई सुरेखा जगताप (वय ४५ वर्षे) या दोघांचा १५ जुलै २०२५ रोजी रात्री आठ ते नऊ वाजण्याच्या दरम्यान अज्ञात व्यक्तींनी खून केला होता. या घटनेमुळे पंढरपूर शहरात प्रचंड खळबळ उडाली होती. गेल्या ६ महिन्यापासून पोलीस या प्रकरणाचा तपास करत होते; मात्र त्यांना यश मिळत नव्हते.याबाबत दैनिक सोलापूर तरुणभारत मधुन या दुहेरी खूनातील आरोपी फरार,खूनाच्या तपासाला गती हवी, वरिष्ठ अधिकाऱ्यांनी स्वत: लक्ष घालून खूनाचा तपास त्वरीत लावावा आदीं ठळक मथळ्याखाली वेळोवेळी बातम्या प्रसिध्द केलेल्या होत्या. त्यामुळे दैनिक सोलापूर तरुण भारत मधील बातम्यांची दखल घेत पोलिसाची यंत्रणा देखील जोमाने कामाला लागलेली होती.
दरम्यान या प्रकरणातील तीन आरोपींना पोलिसांनी अटक केली आहे. विशेष म्हणजे या मधील एका जणाला राजस्थान येथील जटाबास (जोधपूर ) येथून पोलिसांनी ताब्यात घेतलेले आहे. दरम्यान हे तिघेही आरोपी मोठ्या कुटुंबातील असून त्यांना काहीसा राजकीय वारसा असल्याची देखील माहिती सुत्रांकडून प्राप्त झालेली आहे.
यातिघांनीही लखन जगताप व त्याची आई सुरेखा जगताप यांचा कोणत्या कारणावरून खून केला.
याचा तपास करण्यासाठी पोलिसांनी सर्व संशयीतांना येथील प्रथमवर्ग न्यायदंडाधिकाऱ्यां समोर उभे केले होते. त्यावेळी न्यायाधीशांनी दोन्ही आरोपींना नऊ दिवस पोलीस कोठडीत ठेवण्याचा आदेश दिले तर या मधील एका विधीसंघर्षग्रस्त बालकाची सोलापूर येथे रवानगी करण्यात आली आहे.पोलिस कोठडी मिळालेल्या दोन्ही संशयीतांकडून या प्रकरणाचा तपास करताना खून कशासाठी करण्यात आला, कोणी केला आदीं बाबींचा उलगडा होण्यास मदत होणार आहे. पोलिसांनी गेल्या सहा महिन्यापासून प्रलंबित असलेल्या या दुहेरी खून प्रकरणाचा तपास लावल्यामुळे नागरिकांतून समाधान व्यक्त होत आहे.
—————————–
अत्यंत गोपनीय पध्दतीने केला तपास
या दुहेरी खून प्रकरणाच्या तपास कामा मध्ये सहाय्यक पोलीस अधीक्षक तथा येथील उपविभागीय पोलिस अधिकारी प्रशांत डगळे यांनी महत्वाची भूमिका बजाविली आहे. प्रशांत डगळे यांनी आपल्या जवळील काही निवडक पोलिस अधिकारी आणि कर्मचाऱ्यांच्या मदतीने अत्यंत काळजीपूर्वक आणि गोपनीयपणे स्वत: जातीने लक्ष घालून या प्रकरणाचा तपास करीत राजस्थान येथील जाटाबास (जोधपूर ) येथून एकाला तर अन्य दोघांना पंढरपूर येथूनच अत्यंत शिताफीने जेरबंद करुन न्यायालया समोर उभे करण्यापर्यंतची कामगिरी चोखरित्या बजाविली आहे.
पोलिस तपासा मध्ये आणखी कोणाचा या प्रकरणात सहभाग आहे काय ? जर असेल तर त्यांच्या पर्यंत देखील पोलिस लवकरच पोहचतील असा विश्वास देखील पोलिस सुत्रांकडून व्यक्त केला जात आहे.
