सोलापूर : महापालिकेतील १० स्वीकृत सदस्य नियुक्तीसाठी आयुक्त कार्यालयात मोठी गर्दी पाहायला मिळाली.१० जागांसाठी ६२ अर्ज दाखल झाले आहेत. भाजपने २० इच्छुकांना अर्ज भरण्याच्या सूचना दिल्या होत्या. दरम्यान, स्वीकृत नगरसेवकसाठी जोरदार रस्सीखेच असल्याचे चित्र पाहायला मिळाले. भाजप शहराध्यक्ष रोहिणी तडवळकर , माजी नगरसेवक जगदीश पाटील यांच्यासह अनेकांनी अर्ज भरले. एमआयएम पक्षाच्या वतीनेही अर्ज दाखल करण्यात आले आहेत. भाजपकडून सामाजिक समतोल साधण्याचा प्रयत्न झाला आहे.
महापालिकेच्या नामनिर्देशित म्हणजेच १० स्वीकृत सदस्यांच्या नियुक्तीकरिता संबंधितांना आज बुधवार, दि. १८ फेब्रुवारी रोजी सकाळी ११ ते दुपारी १.३० वाजेपर्यंत महापालिकेतील इंद्रभुवन इमारतीतील आयुक्त कार्यालयात अर्ज सादर करण्यासाठी मोठी गर्दी दिसून आली. नगरसचिव प्रवीण दंतकाळे यांनी हे अर्ज स्वीकारले. वरिष्ठ लिपिक नितीन गायकवाड यांनी त्यांना सहकार्य केले. रितसर अर्ज घेऊन त्यांना पावती देण्यात आली.
सोलापूर महापालिकेची नवीन टर्ममधील पहिली सर्वसाधारण सभा शुक्रवार, दि. २० फेब्रुवारी रोजी सकाळी ११ वाजता बोलवण्यात आली आहे. या सभेमध्ये १० स्वीकृत सदस्य, स्थायी समितीचे १६ तर परिवहन समितीच्या १२ सदस्यांची नियुक्ती होणार आहे.
नूतन महापौर विनायक कोंड्याल यांच्या अध्यक्षतेखाली ही सभा होणार आहे. ही सभा शुक्रवार, २० फेब्रुवारी रोजी सकाळी ११ वाजता महानगरपालिकेच्या कै, यशवंतराव बळवंतराव सभागृह (कौन्सिल हॉल) येथे होणार आहे. महापालिकेचे नगरसचिव प्रवीण दंतकाळे यांनी या सभेचा अजेंडा प्रसिद्ध केला आहे. याशिवाय महाराष्ट्र महानगरपालिका (नामनिर्देशित सदस्यांची अर्हता व नियुक्त्या) नियम २०१२ नुसार सोलापूर महानगरपालिकेत 10 नामनिर्देशित सदस्यांची आयुक्तांच्या दि.9 फेब्रुवारीच्या टिपणीत नमूदप्रमाणे नियुक्ती करण्याचा विषय सभेपुढे ठेवण्यात आला आहे. संख्याबळानुसार भाजपाला नऊ तर एमआयएमला एक स्वीकृत सदस्य नामनिर्देशित करता येणार आहे.
दरम्यान, महापालिकेच्या नामनिर्देशित अर्थात १० स्वीकृत सदस्यत्वासाठी बुधवार, दि. १८ फेब्रुवारी रोजी सकाळी ११ ते दुपारी १.३० वाजेपर्यंत महापालिकेतील आयुक्त कार्यालयात अर्ज स्वीकृती प्रक्रिया पार पडली. दहा जागांसाठी मोठ्या प्रमाणात अर्ज दाखल झाले आहेत. सकाळी ११.४० वाजता भाजपच्या शहराध्यक्ष रोहिणी तडवळकर यांच्यासह इच्छुक उमेदवारांनी महापालिकेत येऊन स्वीकृत नगरसेवक पदासाठी अर्ज दाखल केले. त्याचबरोबर एमआयएम पक्षाकडूनही इच्छुकानी अर्ज दाखल केले. एकूण ६२ जणांनी आपले अर्ज दाखल केले आहेत. दरम्यान, यामध्ये भाजपाकडून विविध समाज घटकांना प्रतिनिधित्व देण्याचा प्रयत्न करण्यात आला असल्याचे दिसून येते.
भाजपकडून 20 इच्छुकांना अर्ज
भरण्याच्या सूचना : तडवळकर
भाजप पक्षाकडे स्वीकृत नगरसेवक पदासाठी मोठ्या प्रमाणात इच्छुकांच्या अर्ज प्राप्त झाले होते. त्यापैकी २० इच्छुकांना अर्ज भरण्याच्या सूचना पक्षाने दिल्या आहेत. त्यानुसार माझ्यासह 20 जणांनी अर्ज दाखल केले आहेत. येत्या 20 फेब्रुवारी रोजी होणाऱ्या महापालिकेच्या सर्वसाधारण सभेत 20 पैकी नऊ जणांची नावे निश्चित करण्यात येणार आहेत. मुख्यमंत्री देवेंद्र फडणवीस यांनी मान्यता दिल्यानंतर ती यादी पालकमंत्री जयकुमार गोरे यांच्याकडे येईल. त्यानंतर 20 फेब्रुवारीच्या सभेत
ही नावे घोषित करण्यात येतील, असे भाजप शहराध्यक्ष रोहिणी तडवळकर यांनी स्पष्ट केले.
पक्षाने आदेश दिल्यास एक पद सोडायलाही तयार
एक व्यक्ती एक पद या नियमानुसार काय निर्णय घेणार या प्रश्नाच्या उत्तरात भाजपा शहराध्यक्ष रोहिणी तडवळकर म्हणाल्या, स्वीकृत नगरसेवकसाठी पक्षाने अर्ज भरण्याचे सुचित केल्यानंतर मी अर्ज दाखल केला आहे. भाजपचे प्रदेशाध्यक्ष रवींद्र चव्हाण हे आमदार आहेत. त्याचबरोबर त्यांच्याकडे अध्यक्ष पदाचीही जबाबदारी आहे. यामुळे पक्षाने आदेश दिल्यास पद सोडण्यास तयार आहे, असे शहराध्यक्ष रोहिणी तडवळकर यांनी सांगितले. दरम्यान, यावेळी माजी नगरसेवक जगदीश पाटील यांनी यापूर्वी अशोक निंबर्गी हे शहराध्यक्ष असताना ते स्वीकृत नगरसेवकही होते याची आठवण करून दिली.
एमआयएमतर्फे नईम सालार यांचे नाव : शेख
एमआयएम पक्षाच्या वरिष्ठ पदाधिकाऱ्यांकडून स्वीकृत नगरसेवकसाठी नईम सालार यांचे नाव अधिकृतरित्या आले आहे. त्यानुसार आम्ही त्यांचा अर्ज भरला आहे. इतर कोणी अर्ज भरला असेल तर आम्हाला त्यांची माहिती नाही, असे एमआयएमच्या गटनेत्या वहिदा भंडाले – शेख यांनी सांगितले. यावेळी या पक्षाचे नगरसेवक उपस्थित होते.
या इच्छुकांनी दाखल केले अर्ज
आज नियोजित वेळेत भाजप शहराध्यक्ष रोहिणी तडवळकर , प्रभाकर जामगुंडे, जगदीश पाटील , शशी थोरात , अक्षय आंजिखाने, श्रीनिवास दायमा, सुधा अळळीमोरे , श्रीकांत घाडगे , जवाहर जाजू , अनुप खंडेलवाल , केतन शहा, वृषाली चालुक्य ,पांडुरंग दिड्डी, ॲड. राजन दीक्षित, ॲड. साधना संगवे , सूरज चव्हाण, कृष्णा झंवर, महेश तापडिया, लक्ष्मीकांत दरक, मल्लिनाथ राचेटि, सोमनाथ केंगनाळकर , रुद्रेश बोरामणी , देवेंद्र भंडारे , नागेश भोगडे , सचिन कुलकर्णी , जय साळुंखे, एमआयएमएम कडून नईम सालार , गाजी जहागिरदार,
फिरदौस पटेल यांच्यासह विविध संस्थांचे पदाधिकारी अपक्ष म्हणून असे एकूण ६२ इच्छुकांनी अर्ज भरले आहेत.
