वेळापूर – पानिपत हरियाणा या ठिकाणी व्यसनमुक्त युवक संघ, महाराष्ट्र यांच्या वतीने अटकेपार झेंडा फडकवणाऱ्या मराठ्यांचा इतिहास जागृत ठेवण्यासाठी रणभूमीवर जाऊन युवकांमध्ये राष्ट्रप्रेम व आपल्या पूर्वजांनी गाजविलेली रणभूमी यांचे दर्शन २२ व २३ फेब्रुवारी रोजी पानिपत हरियाणा या ठिकाणी करण्यात आले.
पुण्यापासून सुमारे १८०० की. मी चा प्रवास करून संघटनेचे युवक पानिपत या ठिकाणी हजर झाले. पानिपत हे ठिकाण सद्य स्थितीत जिल्हाचं असून याचं ठिकाणी १७६१ साली अहमदशहा अब्दाली व मराठे यांच्यामध्ये युध्द झाले होते. अगदी निकराच्या झालेल्या या लढाईत शेवटच्या क्षणी मराठ्यांचा पराभव झाला होता. मात्र या पराभवाने खचून न जाता पुन्हा काही दिवसांनी मराठ्यांनी हा सर्व परिसर म्हणजे अगदी काबूल, कंदाहार पर्यंत जिकूंन आपल्या पराभवाचा वचपा काढला होता.
या वेळी या दोन दिवसीय कार्यक्रमात प्रमोद भापकर व ह भ प बंडातात्या कराडकर यांनी आपल्या व्याख्यानाच्या माध्यमातून युवकांना समरभूमीचे वर्णन सांगितले. यावेळी अगदी छत्रपती शिवाजी महाराज, छत्रपती संभाजी महाराज यांच्या पासून ते पानिपत युद्ध कुणामुळे व कश्यासाठी लढले गेले यांचे वर्णन आपल्या व्याख्याच्या माध्यमातून व्यक्त केले.
पहिले बाजीराव पेशवे,विश्वासराव पेशवे, मल्हारराव होळकर, जनकोजी शिंदे,तुकोजी होळकर, त्र्यबकराव मामा, यशवंतराव पवार, इब्राहिम खान गार्दी, समशेर बहादूर व दत्ताजी शिंदे यांनी अतिशय अतुलनीय पराक्रम करून ही रणभूमी गाजविली होती. महाराष्ट्रातून जाऊन एवढ्या मोठ्या प्रमाणात युद्ध करणारे हे योद्धे आपली प्रेरणा असून त्यांनी अर्पण केलेलं त्यांच्या मृत्युचं व शौर्याचे बलिदान आजही आपणास प्रेरणा देत आहे. इतिहास केवळ वाचून न पाहता त्या ठिकाणी जाऊन त्या क्षात्रतीर्थ ठिकाणचे दर्शन आपण घेतलेच पाहिजे. यावेळी बोलताना ह भ प. बंडातात्या कराडकर यांनी युवकांना केवळ व्यसनमुक्तीचे धडे न देता छत्रपती शिवाजी महाराज व संभाजी महाराज यांच्या कार्यकर्तृत्वाचे व त्यांनी दाखवून दिलेल्या मार्गाचे आचरण करण्याचे एक धाडस या युवकांमध्ये तयार केले आहे. यावेळी माळशिरस, भोर, सातारा, दौंड, बारामती, कोरेगाव, अहिल्यानगर, माण, पुरंदर, कराड, सांगली, या भागातील सुमारे २०० युवक या उपक्रमात सहभागी झाले होते.
यावेळी पानिपत या ठिकाणी असलेल्या स्मारकाचे पुजन करून मानवंदना देण्यात आली. पानिपत येथील रामनारायण मराठा यांनी युवकमित्र बंडातात्या कराडकर व प्रमोद भापकर यांचा सन्मान करून सर्वांचे रुणनिर्देश व्यक्त केले. आजही हरियाणा भागात सुमारे दहा लाख मराठा समाज अस्तित्वात असून त्यातील काही सामाजिक कार्यकर्ते महाराष्ट्रातील इतिहास कार व राजे महाराज तसेच अनेक भागातील युवकांच्या सानिध्यात असून या शौर्य भूमिस आपण सर्वांनी नतमस्तक होण्यासाठी एकदा तरी नक्की भेट द्यावी असे उदगार रामनारायण मराठा यांनी व्यक्त केले.
