वैराग – “स्वच्छता हाच खरा धर्म” आणि “देवळात देव शोधण्यापेक्षा तो श्रमात शोधा” हा संदेश देणाऱ्या राष्ट्रसंत गाडगेबाबा यांची जयंती आज शेळगाव (आर) येथे आगळ्यावेगळ्या पद्धतीने साजरी करण्यात आली. येथील **’एकता महिला मंच’**च्या वतीने केवळ प्रतिमेचे पूजन करण्याच्या पारंपारिक पद्धतीला फाटा देऊन, प्रत्यक्ष हातात झाडू घेऊन परिसर स्वच्छ करत बाबांना खऱ्या अर्थाने अभिवादन करण्यात आले.
कृतीतून साकारले गाडगेबाबांचे विचार
नेहमीच्या प्रथांनुसार हार-फुले वाहण्यापेक्षा गाडगेबाबांच्या विचारांची अंमलबजावणी करणे हीच मोठी श्रद्धांजली आहे, हा विचार समोर ठेवून महिला मंचच्या सदस्यांनी आज एकत्र येत गावच्या अंगणवाडी शाळा आणि जिल्हा परिषद प्राथमिक शाळा परिसराची साफसफाई केली. महिलांनी स्वतः झाडू मारून संपूर्ण परिसर चकाचक केला आणि स्वच्छतेचा संकल्प सोडला.
समाजासमोर नवा आदर्श
केवळ औपचारिकता न पाळता राबवलेल्या या उपक्रमाचे सर्व स्तरांतून कौतुक होत आहे. ‘एकीचे बळ’ आणि ‘स्वच्छतेचा वसा’ यांतून एकता महिला मंचने समाजासमोर एक नवा आदर्श निर्माण केला आहे.
“बाबांनी आयुष्यभर हातात झाडू घेऊन समाजाची घाण साफ केली. त्यांच्या जयंतीला केवळ फोटोची पूजा करण्यापेक्षा त्यांनी दिलेला स्वच्छतेचा मंत्र आचरणात आणणे आम्हाला जास्त महत्त्वाचे वाटले.”
—(गीतांजली जोशी- एकता महिला मंच, तालुका प्रसिद्धी प्रमुख)
यांची लाभली उपस्थिती:
या स्तुत्य उपक्रमात एकता महिला मंचच्या तालुका प्रसिद्धी प्रमुख गीतांजली जोशी यांच्यासह आशा विभुते, पंचशील बनसोडे, सविता काटे, सारिका जाधव, पुजा बादगुडे, पुजा कुशवाहा, कविता मगर यांसह इतर सदस्यांनी मोठ्या उत्साहाने सहभाग नोंदवला.
