सोलापूर : भारतीय जनता पक्षाचे कट्टर समर्थक व प्रभाग क्रमांक ५ मधील प्रभावी कार्यकर्ते म्हणून ओळख असलेले राजाभाऊ आलोरे यांनी शुक्रवारी शिवसेना (एकनाथ शिंदे गट) मध्ये जाहीर प्रवेश केला. सोलापूर शहरातील हॉटेल ऐश्वर्या येथे झालेल्या भव्य कार्यक्रमात सोलापूरचे संपर्कप्रमुख तथा खासदार धैर्यशील माने आणि खा. ज्योती वाघमारे यांच्या प्रमुख उपस्थितीत हा प्रवेश सोहळा पार पडला. यावेळी शेकडो कार्यकर्त्यांच्या उपस्थितीमुळे कार्यक्रमाला उत्स्फूर्त प्रतिसाद मिळाला.
राजू आलोरे यांच्या प्रवेशामुळे सोलापूर शहरातील राजकीय समीकरणांमध्ये बदल होण्याची चर्चा सुरू झाली असून भारतीय जनता पक्षाला मोठे खिंडार पडल्याची चर्चा राजकीय वर्तुळात रंगली आहे.
या प्रवेश सोहळ्यास जिल्हाध्यक्ष अमोल शिंदे, मनीष काळजे, माजी आ. सिद्धाराम म्हेत्रे, रमेश बारस्कर, निवृत्त पोलीस अधिकारी नागनाथ पाटील यांच्यासह विविध क्षेत्रातील मान्यवर उपस्थित होते.
यावेळी उपस्थित मान्यवरांनी राजाभाऊ आलोरे यांचे शिवसेनेत स्वागत करत त्यांच्या सामाजिक व राजकीय कार्याचा गौरव केला. आगामी काळात पक्ष संघटना अधिक मजबूत करण्यासाठी तसेच जनसामान्यांचे प्रश्न सोडविण्यासाठी एकत्रितपणे कार्य करण्याचा निर्धार व्यक्त करण्यात आला.
दरम्यान, नागनाथ पाटील यांच्या नेतृत्वाखाली प्रभाग क्रमांक ५ मधील शेकडो कार्यकर्त्यांनीही शिवसेना (एकनाथ शिंदे गट) मध्ये प्रवेश केला. त्यामुळे शहरातील शिवसेनेची ताकद आणखी वाढल्याचे मत उपस्थितांनी व्यक्त केले.
कार्यक्रमात उपस्थित कार्यकर्त्यांमध्ये उत्साहाचे वातावरण होते. घोषणाबाजी, टाळ्यांचा कडकडाट आणि जल्लोषात पार पडलेल्या या प्रवेश सोहळ्याची शहरभर चर्चा रंगली आहे.
