पंढरपूर – नगरपरिषद व श्री विठ्ठल रूक्मिणी मंदिरे समिती पंढरपूर यांच्या मध्ये संत तुकाराम भवन बांधताना झालेल्या कराराबाबतची पूर्तता तात्काळ करावी अशी मागणी येथील पंढरपूर नगरपरिषदेचे नगरसेवक सौरभ थिटे पाटील यांनी केली आहे. या संदर्भात पालिकेचे मुख्याधिकारी महेश रोकडे यांना त्यांनी निवेदन देखील दिले आहे.
आपल्या या मागणी संदर्भात माहिती देताना नगरसेवक सौरभ थिटे पाटील यांनी सांगितले की,येथील संत तुकाराम भवनच्या जागेवर पंढरपूर शहर विकास आराखड्यात पूर्वी वेगळे आरक्षण होते. संत तुकाराम भवनची जागा मंदिरे समितीला देण्यात आली त्यावेळेस श्री विठ्ठल रुक्मिणी मंदिरे समिती व पंढरपूर नगरपरिषद यांचे मध्ये सामंजस्य करार झाला. त्या करारातील अटींचा भंग श्री विठ्ठल रुक्मिणी मंदिरे समितीने केला आहे. त्या काळातील काही बाबींची तात्काळ पूर्तता करणेत आली. त्यामध्ये संत ज्ञानेश्वर मंडपाच्या खालील बाजूस काही दुकान आहेत ती मंदिरे समितीने पंढरपूर नगर परिषदेकडे हस्तांतरित केले. ते सर्व गाळे पंढरपूर नगरपरिषदेकडून १९८२ मध्ये जे विस्थापित झाले होते त्यांना देण्यात आले. त्याचे डिपॉझिट व भाडे पंढरपूर नगरपरिषदेला आज सुद्धा मिळत आहे.
दरम्यान पालिका आणि मंदिर समितीच्या मधील करारातील दुसरी अट जी होती ती संत तुकाराम भवन बांधताना तळमजल्यावर तुकाराम भवनच्या सर्व बाजूने गाळे काढण्यात यावेत. समोरच्या ( फ्रंट साईडला) बाजूला चार गाळे मोठे काढावेत, त्यातील दोन गाळे नगरपरिषदेला देण्यात यावेत व दोन गाळे मंदिर समितीने त्यांच्याकडे ठेवावेत. तुकाराम भवनच्या तीनही बाजूस दुकानात गाळे काढावेत व ते सर्व दुकान गाळे नगर पालिकेकडे हस्तांतरित करावीत. पंढरपूर नगरपरिषदेने ते सर्व गाळे १९८२ मध्ये शहर विकास आराखड्यामध्ये विस्थापितांना (बाधीतांना) द्यावेत असे करारात ठरले होते.
दरम्यान श्री विठ्ठल रुक्मिणी मंदिर समितीने संत तुकाराम भवन बांधताना त्या पद्धतीने बांधकाम केले. मात्र पंढरपूर नगरपरिषदेने त्याचा पाठपुरावा न केल्याने ती नगरपरिषदेकडे हस्तांतरित न करता त्या दुकान गाळ्याच्या बाहेरच्या बाजूने भिंत बांधली व तेथील शटर्स आतल्या बाजूला लावली. आपण याची पाहणी करू शकता आज देखील संत तुकाराम भवन मध्ये जो भोजन कक्ष आहे त्या भोजन कक्ष हॉलच्या पूर्व बाजूस पाच,पाच फुटाचे शटर्स लावलेली दिसतील. आतल्या बाजूचे ही शटर्स लावण्याची काय आवश्यकता होती ? कारण बांधकाम परवाना नगर परिषदेने देताना दुकान गाळ्यासहित बांधकाम परवाना दिला होता.
मात्र वापर परवाना देताना त्याबाबत नगर परिषदेने योग्य लक्ष दिले नाही. नगर परिषदेने योग्य लक्ष दिले असते तर अंदाजे ४० ते ५० दुकान गाळे १९८२ च्या विस्थापितांना मिळाले असते. आता नगर परिषदेने श्री विठ्ठल रुक्मिणी मंदिरे समितीकडून सर्व दुकान गाळे दिलेल्या बांधकाम परवान्या प्रमाणे तयार करून घ्यावेत व ते दुकान गाळे १९८२ च्या विस्थापितांना, दुकानदारांना व तुकाराम भवन जागेतील बाधितांना अग्रक्रमाने देण्यात यावेत अशी मागणी नगरसेवक सौरभ थिटे पाटील यांनी केली.
या वेळी पंढरपूर नगरपरिषदेचे उपनगराध्यक्ष महादेव धोत्रे, नगरसेवक लक्ष्मण भाऊ शिरसट, नगरसेवक अमोल डोके, नगरसेवक सुनील वाळूजकार, नगरसेवक सुजितकुमार सर्वगोड, नगरसेविका अर्चना शिंदे, नगरसेविका संध्याताई शेंबडे, माजी नगरसेवक संग्राम अभ्यंकर, समाजसेवक शरद बापू माने, अशोक पिंटू शिंदे माजी नगरसेवक किरण घाडगे उपस्थित होते.
