सोलापूर : विश्वरत्न डॉ. बाबासाहेब आंबेडकर यांच्या जयंतीनिमित्त आवश्यक सोयी-सुविधा उपलब्ध करून देण्यात याव्यात यासह विविध १४ मागण्याचे निवेदन बोधिसत्व डॉ. बाबासाहेब आंबेडकर जयंती उत्सव मध्यवर्ती महामंडळाच्या वतीने महापौर विनायक कोंड्याल यांना देण्यात आले.
दरवर्षीप्रमाणे जयंतीनिमित्त सोलापूर जिल्हा व तालुक्यातील भीमसैनिक, विविध राजकीय पक्षांचे पदाधिकारी-कार्यकर्ते, सर्व जातीधर्मातील नागरिक, तसेच खासदार, आमदार, अधिकारी मोठ्या संख्येने उपस्थित राहून डॉ. बाबासाहेब आंबेडकर यांच्या पूर्णाकृती पुतळ्यास अभिवादन करतात. या पार्श्वभूमीवर पुतळा परिसर व मागील संविधान भवन (नार्थकोट मैदान) शाळेच्या जागेचा सर्वांगीण विकसित करावे अशी मागणी करण्यात आली.
महामंडळाचे विश्वस्त समिती अध्यक्ष आनंद चंदनशिवे, विश्वस्त बाळासाहेब वाघमारे व इतर पदाधिकाऱ्यांनी दिलेल्या निवेदनात पुतळा परिसर व सम्राट अशोक स्तंभ परिसराचे सुशोभीकरण, मंडप व लाईट व्यवस्था, पुतळ्याचे रंगकाम, नामफलक दुरुस्ती, पिण्याच्या पाण्याच्या आरओ मशिनची दुरुस्ती किंवा नवीन बसविणे, ग्रील गेट व पायऱ्यांवरील ग्रील दुरुस्ती, फोकस लाईट सुरू करणे आदी मागण्या मांडल्या आहेत.
पुतळ्याच्या पाठीमागील नियोजित संविधान भवन (नार्थकोट मैदान) शाळेच्या सुमारे १ एकर जागेवर स्वच्छता मोहीम राबविणे, वॉल कंपाऊंडला रंगरंगोटी, स्लोगन दुरुस्ती, काटेरी झुडपे हटविणे, नवीन इलेक्ट्रिक बोअर मारणे, रोड रोलर फिरविणे, कट्टा उभारणे आदी कामे करण्याची मागणीही केली आहे. यावेळी महापौर विनायक कोंड्याल यांचा शाल व पुष्पगुच्छ देऊन सत्कार करण्यात आला.
याप्रसंगी विश्वस्त अध्यक्ष आनंद चंदनशिवे, बाळासाहेब वाघमारे, मिलिंद प्रक्षाळे, शांतीकुमार नागटिळक, विकी शेंडगे, दयानंद बनसोडे, आशुतोष नाटकर, दीपक गवळी, बाळासाहेब बनसोडे, दिना मेंबर, चाचा सोनवणे, दत्ता शिंदे, अनिल कोणे, प्रदीप गवळी तसेच इतर कार्यकर्ते व पदाधिकारी मोठ्या संख्येने उपस्थित होते.
