सोलापूर – पद्मशाली शिक्षण संस्था संचलित कुचन प्रशाला कनिष्ठ महाविद्यालय व व्यवसाय शिक्षण येथे रविवार दि.22/03/2026 रोजी इ. 11वी 1975 च्या बॅचचे माजी विद्यार्थ्यांचा स्नेह मेळावा उत्साहपूर्ण वातावरणात संपन्न झाला.अनेक वर्षानंतर एकत्र आलेल्या माजी विद्यार्थ्यांनी जुन्या आठवणींना उजाळा देत आनंदमय वातावरण निर्माण केले. प्रशालेतील खोली क्रमांक 18 (त्यावेळची त्यांची वर्गखोली) मध्ये सर्व विद्यार्थी एकत्रित जमले. सुरुवातीला राष्ट्रगीत घेऊन कार्यक्रमाची सुरुवात करण्यात आली.
या कार्यक्रमासाठी पद्मशाली शिक्षण संस्थेचे अध्यक्ष ॲड. श्रीनिवास क्यातम तसेच या बॅचला शिकवत असलेले माजी शिक्षक नंदकुमार महामुनी, लीला गंजी, मधुकर बेत, सुधा मंद्रूपकर व उपमुख्याध्यापक मधुकर धर्मसाले, शिक्षण सेवक राजशेखर स्वामी,शिवशंकर स्वामी यांची प्रमुख उपस्थिती होती. कार्यक्रमाच्या प्रारंभी उपस्थित माजी विद्यार्थी, शिक्षक वृंद व मान्यवरांचे स्वागत करण्यात आले. यावेळी शालेय जीवनातील आठवणी, वर्गातील प्रसंग, शिक्षकांचे मार्गदर्शन तसेच मित्र-मैत्रिणी मधील जिव्हाळ्याच्या आठवणींना उजाळा देण्यात आला.
अनेक वर्षानंतर भेट झाल्याने सर्वांच्या चेहऱ्यावर आनंद आणि भावनिक वातावरण पाहायला मिळाले. काहींनी शिक्षकांशी बोलताना” मी आज अभ्यास केला नाही, उद्या शाळेत येणार नाही’ अशा छोट्या मोठ्या गोष्टीतून जुन्या आठवणींना उजाळा दिला. विशेष म्हणजे सुमारे 65 ते 68 वर्षे वयोगटातील या माजी विद्यार्थ्यांनी वयोमानाला न जुमतात कार्यक्रमात आनंदाने, उत्साहाने आणि मनापासून सहभाग नोंदवला.
यावेळी वय वाढले, काळ बदलला पण शाळेच्या आठवणी आणि मैत्रीचे नाते आजही तितकेच जिवंत आहे अशा भावना व्यक्त केल्या. या माजी विद्यार्थ्यांनी दाखविलेला उत्साहपूर्ण सहभाग आणि आनंद उपस्थितांच्या मनात कायमस्वरूपी ठसा उमटवून गेला. हा कार्यक्रम यशस्वी होण्याकरता देविदास आरकाल यांनी विशेष प्रयत्न केले. तर या कार्यक्रमासाठी लक्ष्मीनारायण कुचन, राजमोगली इप्पलपल्ली, तुकाराम गंधमल, विवेकानंद श्रीपती, शिवकुमार गज्जम अशा समाजातील मान्यवर 45 ते 50 माजी विद्यार्थ्यांनी सहभाग नोंदवला.
याप्रसंगी नंदकुमार महामुनी,मधुकर बेत, लीला गंजी, ऍड.श्रीनिवास क्यातम यांनी आपले मनोगत व्यक्त केले. कार्यक्रमाचे सूत्रसंचालन लक्ष्मीनारायण कुचन यांनी केले
