हदगाव – तालुक्यातील मौजे चक्री येथे श्रीराम नवमी व महारुद्र हनुमान जयंतीनिमित्य अखंड हरिनाम सप्ताह ग्रंथराज ज्ञानेश्वरी पारायण व भव्य राम कथेचे आयोजन करण्यात आले आहे. या अखंड हरिनाम सप्ताहाला गुरुवार दि.26 एप्रिल 2026 रोजी सुरुवात झाली असुन या सप्ताहात विविध धार्मिक कार्यक्रमांचे आयोजन करण्यात आले आहे.
दररोज सकाळी 4 ते 6 काकडारती भजन, सकाळी 6 ते 9 ज्ञानेश्वरीपारायण, दुपारी 1 ते 4 श्रीराम कथा, सायं 5 ते 7 हरिपाठ व रात्री 8:30 ते 10:30 हरिकीर्तन, असे दैनंदिन कार्यमाचे आयोजन करण्यात आले आहे या सप्ताहात महाराष्ट्रातील विविध भागातील प्रसिद्ध कीर्तनकारांची हरी कीर्तने होणार आहेत. गुरुवार दि.2 एप्रिल 2026 रोजी सकाळी 8 वाजता हनुमान जयंतीनिमित्त श्रीची मिरवणूक व ग्रामप्रदक्षिणेनंतर 11 ते 1 या वेळेत संतोष महाराज पळसोनेकर यांचे काल्याचे कीर्तन व त्यानंतर महाप्रसादाने या अखंड हरिनाम सप्ताहाची सांगता होणार आहे.
परिसरातील सर्व भाविक भक्तांनी या अखंड हरिनाम सप्ताह व दररोज सायंकाळी 4 ते 7 या वेळेत आयोजित महाप्रसादाचा लाभ घ्यावा असे आवाहन समस्त चक्री ग्रामस्थांतर्फे करण्यात आले आहे
गावचे ग्रामदैवत असलेल्या मारुतीरायाची “नवसाला पावणारा मारुती” म्हणुन महाराष्ट्रभर वेगळी ओळख आहे.
आठवड्यातील दर शनिवारी सकाळी 5 वाजल्यापासूनच येथे विविध भागातून व्यापारी, डॉक्टर,शासकीय कर्मचारी,रुग्ण,राजकीय नेते,नविन नोकरी लागलेले तरुण-तरुणी हनुमंतराया चरणी केलेली आपली मनोकामना पुर्ण झाल्याने आरती व दर्शनास हजेरी लावतात.तर बहुतांश भक्त मंडळी बोललेला नवस पूर्ण झाल्याने हनुमंतराया चरणी दुग्धाभिषेक करून नगर भोजन म्हणून संपूर्ण गावाला गाव जेवण देतात.गतवर्षीच्या हनुमान जयंती पासुन आजपर्यंत येथे 30 ते 40 नगरभोजन झाल्याच्याची माहिती येथिल ग्रामस्थांनी दिली तर बाहेर गावच्या हनुमानभक्तांचा आदर्श घेत चक्री येथिल ग्रामस्थांनी यावर्षीपासून सप्ताहनिमित्त येणाऱ्या भाविकभक्तांसाठी व गावकरी मंडळीसाठी सात दिवस सायंकाळी 4 ते 7 या वेळेत नगरभोजन महाप्रसादाचे आयोजन केले आहे.
