सोलापूर – आनंदाच्या क्षणासाठी उभारलेल्या स्वागत कमानीनेच एका कुटुंबावर दुःखाचा डोंगर कोसळला. कुमठा नाका परिसरातील स्वागतनगर रोडवर बुधवारी सायंकाळी घडलेल्या अपघातात २४ वर्षीय तरुणाचा विजेच्या धक्क्याने मृत्यू झाला.
केतन रमेश पाटोळे वय 24 , रा. भारतनगर, कुमठा नाका असे मृत तरुणाचे नाव असून, तो अत्यंत मेहनती व सर्वांच्या मदतीला धावून जाणारा म्हणून ओळखला जात होता. गुरुवारी होणाऱ्या कार्यक्रमाच्या तयारीसाठी यशवंत सोसायटी, स्वागतनगर येथे मंडप उभारण्यात आला होता. त्याच मंडपासमोरील स्वागत कमानीवर झेंडा लावण्यासाठी केतन वर चढला होता.
झेंड्यासाठी वापरलेल्या कापडाला जोडलेला स्टीलचा पाइप आणि कमानीच्या अगदी शेजारी असलेली विद्युत तार यांचा संपर्क आला आणि क्षणार्धात सर्व काही बदलून गेले. जोरदार विजेचा धक्का बसताच केतन सुमारे 20 फूट उंचीवरून खाली कोसळला. हा थरारक प्रसंग पाहून आजूबाजूचे तरुण हादरून गेले.
सोबत असलेल्या मित्राने तत्काळ आरडाओरडा करत मदतीसाठी धाव घेतली. उमेश पाटोळे यांनी केतनला तातडीने शासकीय रुग्णालयात दाखल केले; मात्र डॉक्टरांनी तपासणीनंतर त्याला मृत घोषित केले.
घरातील कर्ता तरुण अशा अचानक निघून गेल्याने आईवर दुःखाचा डोंगर कोसळला आहे. रुग्णालय परिसरात मित्र-नातेवाइकांची झालेली गर्दी आणि त्यांच्या डोळ्यातील अश्रू हीच या घटनेची तीव्रता सांगून जात होती.
