पंढरपूर – एज्युकेशन सोसायटीच्या द. ह.कवठेकर प्रशालेत पुणे रोटरी क्लबचे पदाधिकारी धनंजय राजुरकर यांच्या सहकार्याने व पोलाद स्टील कंपनी यांच्या सीएसआर फंडाच्या माध्यमातून शालेय विद्यार्थ्यांसाठी आकाश दर्शन, ग्रह तारे, खगोलशास्त्रीय माहितीचा कार्यक्रम डोमच्या माध्यमातून प्रशालेत आयोजित करण्यात आला होता.
या कार्यक्रमात आकाशातून दिसणारे पृथ्वीचे विलोभनीय दर्शन, पृथ्वीभोवती प्रदक्षिणा घालणारा चंद्र, लाल रंगाचा मंगळ, आपल्या कड्यांनी वेढलेला विलोभनीय शनी, सूर्याच्या जवळून भ्रमंती करणारा बुध, तेजस्वी दिसणारा शुक्र, युरेनस, नेपच्यून आधी ग्रह व विविध प्राण्यांच्या नावावरून ओळखले जाणारे तारका समूह यांचे जणू प्रत्यक्ष दर्शनच या कार्यक्रमाच्या माध्यमातून विद्यार्थ्यांना लाभले.यावेळी तारे ग्रह यांची मराठी भाषेत सखोल माहिती देण्यात आली. हे सर्व पाहून विद्यार्थ्यांच्या (बाल चमुंच्या ) डोळ्यात आनंदाश्रू उभे राहिले .टाळ्यांच्या गजरात सर्वांनी कार्यक्रमाचा आनंद लुटला.
दरम्यान कार्यक्रमाची सुरुवात विद्यार्थ्यांचे स्वागत करून प्रशालेचे मुख्याध्यापक व्ही.एम.कुलकर्णी यांनी केली यावेळी पर्यवेक्षक आर.एस. कुलकर्णी, श्री.शेलार, ज्येष्ठ शिक्षक श्री.खजूरगे, श्री.गावडे आणि अहिल्या पवार आदी उपस्थित होते.
प्रशालेचे मुख्याध्यापक व्ही.एम.कुलकर्णी यांनी या प्रोजेक्ट बद्दल विद्यार्थ्यांना माहिती दिली. रोटरी क्लबचे सदस्य धनंजय राजुरकर, कवठेकर प्रशालेचे शिक्षक चंद्रशेखर राजुरकर व पोलाद स्टील कंपनी यांचे कार्यकारी अधिकारी व संयोजक यांचे प्रशालेच्या वतीने आभार व्यक्त केले. या कार्यक्रमाच्या आयोजनासाठी संस्थेचे मानद सचिव एस.आर.पटवर्धन यांचे सहकार्य लाभले.याकामी तंत्रज्ञ गणेश मेणसे व धनराज मेणसे यांचे मोलाचे सहकार्य लाभले.
—————————
एक हजार ५०० विद्यार्थी घेणार लाभ
येथील द.ह.कवठेकर प्रशाले मध्ये दोन दिवस या कार्यक्रमाचे आयोजन करण्यात आले आहे. त्यामुळे प्रशालेचे सुमारे १ हजार ५०० विद्यार्थी या कार्यक्रमाचा लाभ घेणार असल्याची माहिती प्रशालेच्या वतीने मुख्याध्यापक व्ही.एम.कुलकर्णी यांनी दिली.
