सोलापूर : भारतरत्न डॉ. बाबासाहेब आंबेडकर यांच्या जयंती मिरवणुकीसाठी महापालिका प्रशासनाच्या वतीने सर्वंकष तयारी करण्यात आली असून नागरिकांना कोणतीही अडचण भासू नये यासाठी सर्व विभागांना सतर्क राहण्याच्या सूचना देण्यात आल्या आहेत. मिरवणूक मार्ग स्वच्छ, सुरक्षित आणि सुव्यवस्थित ठेवण्यासाठी सर्व यंत्रणा समन्वयाने काम करत आहेत. तसेच नागरिकांनीही प्रशासनाला सहकार्य करत शिस्तबद्ध पद्धतीने मिरवणुकीत सहभागी व्हावे, असे आवाहन महापौर विनायक कोंड्याल यांनी केले आहे.
भारतरत्न डॉ. बाबासाहेब आंबेडकर यांच्या जयंतीनिमित्त रविवारी १९ एप्रिल रोजी निघणाऱ्या भव्य मिरवणुकीच्या निमित्ताने सोलापूर महानगरपालिका व पोलीस प्रशासनाने संयुक्तरीत्या मिरवणूक मार्गाची सखोल पाहणी केली. या पाहणी दौऱ्यात महापौर विनायक कोंड्याल यांच्या मार्गदर्शनाखाली विविध विभागांच्या अधिकाऱ्यांनी तयारीचा आढावा घेतला..यावेळी उपमहापौर ज्ञानेश्वरी देवकर, सभागृह नेते नरेंद्र काळे, पोलीस आयुक्त एम. राजकुमार, महापालिका आयुक्त डॉ. सचिन ओम्बासे, अतिरिक्त आयुक्त संदीप कारंजे, पोलीस उपायुक्त गौउर हसन, विजय कबाडे, अश्विनी पाटील, नगर अभियंता सारिका अकुलवार, कार्यकारी अभियंता (विद्युत) राजेश परदेशी यांच्यासह भारतरत्न डॉ. बाबासाहेब आंबेडकर मध्यवर्ती जयंती उत्सव समिती व बोधिसत्व डॉ. बाबासाहेब आंबेडकर जयंती उत्सव मध्यवर्ती महामंडळाचे पदाधिकारी उपस्थित होते. यामध्ये राजाभाऊ सरवदे, माजी नगरसेवक आनंद चंदनशिवे, बाळासाहेब वाघमारे, के.डी. कांबळे, मिलिंद प्रक्षाळे, सुबोध वाघमोडे, लौकिक इंगळे, नागेश इंगळे, अजित बनसोडे, प्रवीण निकाळजे, रॉकी बंगाळे, दशरथ कसबे, पिंटू डावरे, विकी शेंडगे, सुशील सरवदे, शिवम सोनकांबळे, विनोद वाघमारे, बबन शिंदे तसेच विनीत गायकवाड, सुग्रीव जेटीथोर, अविनाश आठवले, योगेश कांबळे, शुभम धावने आदी मान्यवरांचा सहभाग होता.
मिरवणूक मार्गावरील विविध बाबींचा बारकाईने आढावा घेण्यात आला. मिरवणुकीत कोणताही अडथळा निर्माण होऊ नये यासाठी रस्त्यावरील झाडांच्या फांद्या छाटणे, खराब रस्त्यांची दुरुस्ती करणे, विद्युत खांबांवरील दिव्यांची दुरुस्ती करणे तसेच इतर आवश्यक कामे तातडीने पूर्ण करण्याच्या सूचना महापौर विनायक कोंड्याल यांनी संबंधित अधिकाऱ्यांना दिल्या. स्वच्छता, वाहतूक व्यवस्थापन आणि नागरिकांच्या सुरक्षिततेच्या दृष्टीने सर्व उपाययोजना काटेकोरपणे राबविण्याचे निर्देशही दिले.
पोलीस विभागाकडून सविस्तर नियोजन : पोलीस आयुक्त
पोलीस आयुक्त एम. राजकुमार यांनी सांगितले की, मिरवणूक मार्गावर वाहतुकीचा अडथळा निर्माण होऊ नये यासाठी पोलीस विभागाकडून सविस्तर नियोजन करण्यात आले आहे. आवश्यक त्या ठिकाणी वाहतूक वळविणे, बंदोबस्त वाढविणे आणि नियंत्रणासाठी विशेष पथके नियुक्त केली जाणार असून कायदा व सुव्यवस्था अबाधित राखण्यासाठी पोलीस प्रशासन पूर्णपणे सज्ज आहे.
