सोलापूर : वालचंद इन्स्टिट्यूट ऑफ टेक्नॉलॉजी (डब्ल्यूआयटी), सोलापूर येथे १५० किलोवॅट क्षमतेच्या अत्याधुनिक हायड्रॉलिक टेस्ट स्टँडच्या स्थापनेमुळे संशोधन व प्रायोगिक शिक्षणाला मोठी चालना मिळणार आहे. डॅनफॉस इंडस्ट्रीज, पुणे यांच्या सहकार्याने उभारण्यात आलेली ही सुविधा विद्यार्थ्यांना उद्योगमानक तंत्रज्ञानाचा प्रत्यक्ष अनुभव देणार असून, अभियांत्रिकी शिक्षणात नव्या संधी निर्माण करणार आहे. या उपक्रमामुळे उद्योग – शिक्षण सहकार्य अधिक बळकट होत सोलापूर परिसरातील तांत्रिक शिक्षणाला नवी दिशा मिळणार आहे.
ही सुविधा केवळ पारंपरिक प्रयोगशाळा नसून विद्यार्थ्यांना प्रत्यक्ष औद्योगिक अनुभव देणारे आधुनिक प्रशिक्षण केंद्र आहे. उच्च क्षमतेच्या हायड्रॉलिक पंप्स आणि मोटर्सची अचूक चाचणी करण्यासाठी सज्ज असलेली ही यंत्रणा सोलापूर व परिसरात एकमेव मानली जात आहे. त्यामुळे विद्यार्थ्यांना जागतिक दर्जाच्या तंत्रज्ञानाचा थेट अनुभव घेण्याची संधी उपलब्ध झाली आहे.
या प्रकल्पामुळे विद्यार्थ्यांचे शिक्षण केवळ सैद्धांतिक ज्ञानापुरते मर्यादित न राहता, प्रत्यक्ष औद्योगिक कौशल्यांशी जोडले जात आहे. हायड्रॉलिक सिस्टीम्स, औद्योगिक ऑटोमेशन, ऊर्जा कार्यक्षमता आणि उच्च दाब तंत्रज्ञान या क्षेत्रांमध्ये विद्यार्थ्यांची कौशल्यवृद्धी आणि संशोधन क्षमतेत मोठी भर पडणार आहे. त्याचबरोबर उद्योग क्षेत्रातील विविध कंपन्यांना त्यांच्या उपकरणांची कार्यक्षमता तपासण्यासाठी विश्वासार्ह आणि अत्याधुनिक टेस्टिंग प्लॅटफॉर्म उपलब्ध होणार आहे.
या महत्त्वाकांक्षी प्रकल्पाच्या उभारणीत डॅनफॉस इंडस्ट्रीजमधील तज्ज्ञांचे मोलाचे योगदान लाभले. राहुल वळे, मनोज घोडमारे, भाग्येश जगताप, सचिन कामाटी आणि राजेश जाधव यांच्या तांत्रिक मार्गदर्शनामुळे ही सुविधा यशस्वीरीत्या साकार झाली आहे. महाविद्यालयातील मेकॅनिकल अभियांत्रिकी विभागप्रमुख डॉ. भाग्येश देशमुख यांच्या नेतृत्वाखाली ही सुविधा कार्यरत राहणार असून, या प्रकल्पासाठी वालचंद शिक्षण समूहाचे मानद सचिव डॉ. रणजित गांधी, विश्वस्त वैभव गांधी, भूषण शहा, पराग शहा तसेच प्राचार्य सचिन गेंगजे यांच्या दूरदृष्टीमुळे महाविद्यालयात आधुनिक तंत्रज्ञानाधारित प्रयोगशाळा उभारणीला गती मिळाली आहे.
भविष्यात या सुविधेच्या माध्यमातून औद्योगिक प्रशिक्षण कार्यक्रम, संशोधन प्रकल्प, तज्ज्ञ व्याख्याने आणि उद्योग – शैक्षणिक सहकार्य उपक्रम मोठ्या प्रमाणावर राबविण्यात येणार आहेत. यामुळे सोलापूरमधील विद्यार्थ्यांना पुणे, मुंबईसारख्या शहरांकडे जाण्याची गरज कमी होऊन स्थानिक पातळीवरच जागतिक दर्जाचे शिक्षण आणि संशोधनाच्या संधी उपलब्ध होतील.
डब्ल्यूआयटी आणि डॅनफॉस इंडस्ट्रीज यांचे हे सहकार्य केवळ एक प्रकल्प नसून, विद्यार्थ्यांच्या भविष्याला दिशा देणारा आणि उद्योग–शिक्षणातील दरी कमी करणारा महत्त्वपूर्ण टप्पा ठरत आहे. त्यामुळे सोलापूरच्या औद्योगिक व शैक्षणिक विकासाला निश्चितच नवी गती मिळणार आहे.
